ദുബായ്: ലോകത്തിലെ ഏറ്റവും വലിയ ഷോപ്പിംഗ് മാളായ ദുബായ് മാളില്‍ ലുലു ഹൈപര്‍ മാര്‍ക്കറ്റ് പ്രവര്‍ത്തനമാരംഭിക്കുന്നു. ഇഅ്മാര്‍ പ്രോപര്‍ടീസ് ചെയര്‍മാന്‍ ജമാല്‍ ബിന്‍ ഥാനിയയുടെ സാന്നിധ്യത്തില്‍ യുഎഇ വ്യാപാര മന്ത്രി ഥാനി ബിന്‍ അഹ്മദ് അല്‍ സിയൂദി തിങ്കളാഴ്ച ഉദ്ഘാടനം നിര്‍വഹിക്കുമെന്ന് ലുലു ഗ്രൂപ് ചെയര്‍മാന്‍ എം.എ യൂസഫലി അറിയിച്ചു.
ദുബായ് ഡൗണ്‍ ടൗണിലും സമീപ പ്രദേശങ്ങളിലുമായി വസിക്കുന്ന താമസക്കാര്‍ക്കും സന്ദര്‍ശകര്‍ക്കുമായി ഏറ്റവും മികച്ചതും ആധുനിക രീതിയിലുള്ളതുമായ ഷോപ്പിംഗ് അനുഭവമായിരിക്കും ലുലു നല്‍കുകയെന്നും അദ്ദേഹം അറിയിച്ചു.
ലോക പ്രശസ്തമായ ബുര്‍ജ് ഖലീഫയോട് ചേര്‍ന്ന് അഞ്ച് ലക്ഷത്തില്‍ പരം സ്‌ക്വയര്‍ മീറ്ററില്‍ വ്യാപിച്ചു കിടക്കുന്ന ദുബായ് മാള്‍ ലോകോത്തര ബ്രാന്‍ഡുകളുടെ കേന്ദ്രം കൂടിയാണ്. പതിനാറാം വര്‍ഷത്തിലേക്ക് കടക്കുന്ന ഈ സമയത്ത് ഇരുനൂറോളം രാജ്യങ്ങളില്‍ നിന്നും ലക്ഷക്കണക്കിനാളുകള്‍ ഷോപ്പിംങിനും സന്ദര്‍ശനത്തിനുമായി വന്നു പോകുന്ന ഇടമെന്ന ഖ്യാതിയും ദുബായ് മാളിനുണ്ട്. ദുബായ് മാളിന്റെ സാബീല്‍ പാര്‍ക്കിംഗ് വഴിയാണ് ലുലു ഹൈപര്‍ മാര്‍ക്കറ്റിലേക്കുള്ള പ്രവേശനം.