ഹൈദരാബാദ്: സംസ്ഥാന സര്‍ക്കാരിന്റെ അധികാര പരിധിക്കുള്ളില്‍ വരുന്ന വിഷയങ്ങളില്‍ സി.ബി.ഐ അന്വേഷണത്തിനുള്ള പൊതുസമ്മതം പിന്‍വലിച്ച് തെലങ്കാന. ഡല്‍ഹി സ്‌പെഷ്യല്‍ പൊലിസ് എസ്റ്റാബ്ലിഷ്‌മെന്റ് ആക്ട് പ്രകാരമുള്ള പൊതുസമ്മതമാണ് സര്‍ക്കാര്‍ പിന്‍വലിച്ചിരിക്കുന്നത്.

ഇത്തരത്തില്‍ പൊതുസമ്മതം പിന്‍വലിക്കുന്ന പത്താമത്തെ സംസ്ഥാനമാണ് തെലങ്കാന. നേരത്തെ, കേരളം, പശ്ചിമ ബംഗാള്‍, പഞ്ചാബ്, മഹാരാഷ്ട്ര, രാജസ്ഥാന്‍, ഛത്തീസ്ഗഡ്, ഝാര്‍ഖണ്ഡ്, മിസോറാം, മേഘാലയ എന്നീ സംസ്ഥാനങ്ങളാണ് നിലവില്‍ സി.ബി.ഐക്കുള്ള പൊതുസമ്മതം പിന്‍വലിച്ചിട്ടുള്ളത്.

ടി.ആര്‍.എസ് എം.എല്‍.എമാരെ പാര്‍ട്ടിമാറ്റാന്‍ ബി.ജെ.പിയുടെ നേതൃത്വത്തില്‍ നീക്കം നടന്നുവെന്ന ആരോപണത്തില്‍ സി.ബി.ഐ അന്വേഷണം ആവശ്യപ്പെട്ട് കഴിഞ്ഞ ദിവസം ബി.ജെ.പി സംസ്ഥാന അധ്യക്ഷന്‍ കഴിഞ്ഞ ദിവസം ഹൈക്കോടതിയെ സമീപിച്ചിരുന്നു. ഇതിന് തൊട്ട് പിന്നാലെയാണ് തെലങ്കാന സര്‍ക്കാരിന്റെ നീക്കം. ബി.ജെ.പിയെ അപകീര്‍ത്തിപ്പെടുത്താനുള്ള കെ.സി.ആറിന്റെ പാര്‍ട്ടിയുടെ ഗൂഢാലോചനയാണിതെന്നും സി ബി ഐയോ എസ് ഐ ടിയോ പോലുള്ള നിഷ്പക്ഷ ഏജന്‍സികള്‍ വിഷയം അന്വേഷിക്കണമെന്നും ആവശ്യപ്പെട്ടായിരുന്നു ബി ജെ പി അധ്യക്ഷനായ ഗുജ്ജുല പരമേന്ദ്രര്‍ കോടതിയെ സമീപിച്ചത്. തെരഞ്ഞെടുപ്പ് കമ്മീഷനും വിഷയത്തില്‍ ബി ജെ പി പരാതി നല്‍കിയിരുന്നു.പാര്‍ട്ടി മാറാന്‍ ടി.ആര്‍.എസ്. എം.എല്‍.എമാര്‍ക്ക് നൂറു കോടി രൂപ വാഗ്ദാനം ചെയ്തുവെന്നാണ് പൊലിസ് രജിസ്റ്റര്‍ ചെയ്ത കേസ്.