ഇടുക്കി: അടിമാലി ശല്യംപാറയ്ക്ക് സമീപം സ്‌കൂള്‍ ബസ്സും പൊലീസ് ജീപ്പും കൂട്ടിയിടിച്ച് അപകടം. വെള്ളത്തൂവല്‍ കല്ലാര്‍കുട്ടി റോഡിലെ പണ്ടാരപ്പടി കോലഞ്ചേരി വളവിലാണ് സ്‌കൂള്‍ ബസും പൊലീസ് ജീപ്പും അപകടത്തില്‍പ്പെട്ടത്. വാഹനങ്ങള്‍ പരസ്പരം കൂട്ടിയിടിക്കുകയായിരുന്നു.

സ്വകാര്യ മാനേജ്‌മെന്റ് സ്‌കൂളായ വിശ്വദീപ്തിയിലെ സ്‌കൂള്‍ ബസും പൈനാവ് ഡി പി ഒയിലെ പൊലീസ് വാഹനവുമാണ് അപകടത്തില്‍പ്പെട്ടത്. അപകടത്തില്‍ വിദ്യാര്‍ഥികള്‍ക്ക് പരിക്കില്ല. പൊലീസ് ജീപ്പില്‍ ഉണ്ടായിരുന്ന 5 പേര്‍ക്ക് പരുക്കേറ്റു. 

പൊലിസ് വാഹനത്തിലുണ്ടായിരുന്ന ഷൈനി, ബീന, പ്രവീണ്‍, ഡ്രൈവര്‍ സനൂപ് എന്നിവര്‍ക്കാണ് പരുക്കേറ്റത്. സാരമായി പരുക്കേറ്റ ഷൈനിയെ കോട്ടയം മെഡിക്കല്‍ കോളജിലേക്ക് മാറ്റി. മറ്റ് മൂന്നു പേരെയും അടിമാലി താലൂക്കാശുപത്രിയില്‍ പ്രവേശിപ്പിച്ചു.

ഓഡിറ്റിംഗ് സംബന്ധമായ ആവശ്യങ്ങള്‍ക്കായി ശാന്തന്‍പാറ പൊലിസ് സ്റ്റേഷനില്‍ എത്തി തിരികെ വരും വഴിയായിരുന്നു അപകടം. അപകട സമയം പ്രദേശത്ത് കനത്ത മഴയായിരുന്നു.