ബെംഗളൂരു: അയല്‍സംസ്ഥാനമായ കര്‍ണാടകയില്‍ സ്‌കൂളുകള്‍ തുറന്നു. ഒന്‍പത്, പത്ത് ക്ലാസുകളും പ്രീ യൂനിവേഴ്‌സിറ്റിയുമാണ് ഇന്നു തുറന്നത്. കനത്ത സുരക്ഷാ പരിശോധനയോടെയും കൊവിഡ് പ്രോട്ടോക്കോള്‍ പാലിച്ചുമാണ് സ്‌കൂള്‍ തുറന്നത്.

വിദ്യാര്‍ഥികളുടെ ഭാവി പരിഗണിച്ചാണ് സ്‌കൂളുകള്‍ തുറക്കാന്‍ തീരുമാനിച്ചതെന്ന് കര്‍ണാടക മുഖ്യമന്ത്രി ബസവരാജ് ബൊമ്മെ പറഞ്ഞു.

നിലവില്‍ രണ്ട് ശതമാനത്തില്‍ താഴെയാണ് കര്‍ണാടകയിലെ ടെസ്റ്റ് പോസിറ്റിവിറ്റി നിരക്ക്. കഴിഞ്ഞ 24 മണിക്കൂറിനിടെ 1189 പേര്‍ക്കാണ് കൊവിഡ് സ്ഥിരീകരിച്ചത്. 22 പേരാണ് മരണപ്പെട്ടത്.

തമിഴ്‌നാട്ടിലും കൊവിഡ് നിയന്ത്രണങ്ങളില്‍ വലിയ ഇളവ് പ്രഖ്യാപിച്ചു. സ്‌കൂളുകളും തിയേറ്ററുകളും തുറന്നുപ്രവര്‍ത്തിക്കാന്‍ തീരുമാനിച്ചിട്ടുണ്ട്. അടുത്ത ദിവസങ്ങളില്‍ തന്നെ ഇവ തുറന്നുതുടങ്ങും.