പോര്‍ട്ടോ: പ്രായം തന്നെ ബാധിച്ചിട്ടില്ലെന്ന് ഒരിക്കലൂടെ തെളിയിച്ച് പോര്‍ച്ചുഗീസ് സൂപ്പര്‍ താരം ക്രിസ്റ്റ്യാനോ റൊണാള്‍ഡോ. ഇന്നലെ രാത്രി നടന്ന യൂറോ യോഗ്യത മത്സരത്തില്‍ സ്ലൊവാക്യയെ രണ്ടിനെതിരെ മൂന്ന് ഗോളുകള്‍ക്ക് പറങ്കിപ്പട കീഴടക്കി. ക്രിസ്റ്റ്യാനോ റൊണാള്‍ഡോയുടെ ഇരട്ടഗോളിന്റെ മികവിലാണ് മത്സരത്തില്‍ പോര്‍ച്ചുഗലിന്റെ വിജയം. ഈ ജയത്തോടെ അടുത്തവര്‍ഷത്തെ യൂറോകപ്പിന് പോര്‍ച്ചുഗല്‍ യോഗ്യത ഉറപ്പാക്കി. ഏഴ് മത്സരങ്ങളും വിജയിച്ച പോര്‍ച്ചുഗല്‍ നിലവില്‍ 21 പോയിന്റുമായി ഗ്രൂപ്പില്‍ ഒന്നാമതാണ്.

സൗദി ലീഗ് മത്സരത്തിലെ മിന്നും ഫോം സ്ലൊവാക്യക്കെതിരായ മത്സരത്തിലും റൊണാള്‍ഡോ പുറത്തെടുക്കുകയായിരുന്നു. 18ാം മിനിറ്റില്‍ ഗോണ്‍സാലോ റാമോസിലൂടെ പോര്‍ച്ചുഗല്‍ ആണ് ആദ്യ ലീഡെടുത്തത്. 29ാം മിനിറ്റില്‍ പെനാല്‍റ്റിയിലൂടെ റൊണാള്‍ഡോ പോര്‍ച്ചുഗലിന്റെ ലീഡ് ഉയര്‍ത്തി.

എന്നാല്‍ രണ്ടാം പകുതിയില്‍ സ്ലൊവാക്യ തിരിച്ചുവന്നു. 69ാം മിനിറ്റില്‍ ഡേവിഡ് ഹാങ്കോയിലൂടെ സ്ലൊവാക്യ ഒരു ഗോള്‍ മടക്കി. 72ാം മിനിറ്റില്‍ റൊണാള്‍ഡോ തന്റെ രണ്ടാം ഗോള്‍ പിറന്നു. 80ാം മിനിറ്റില്‍ സ്റ്റാനിസ്‌ലാവ് ലൊബോട്കയിലൂടെ സ്ലൊവാക്യ ഒരു ഗോളടിച്ചെങ്കിലും പരാജയം ഒഴിവാക്കാനായില്ല.

കരിയറിലെ 125ാം ഗോള്‍ ആണ് ഇന്നലത്തെ ക്രിസ്റ്റ്യാനോ റൊണാള്‍ഡോയുടെ രണ്ടാം ഗോള്‍. തുടര്‍ച്ചയായി ഇരുപത്തിയൊന്നാമത് സീസണിലാണ് ക്രിസ്റ്റ്യാനോ അന്താരാഷ്ട്ര തലത്തില്‍ ഗോള്‍ നേടുന്നത്.

ഈ വിജയത്തോടെ പോര്‍ച്ചുഗല്‍ യൂറോ കപ്പ് യോഗ്യത ഉറപ്പിച്ചു. ഈ മാസം 17ന് ബോസ്‌നിയ ആന്‍ഡ് ഹെര്‍സഗോവിനെയ്‌ക്കെതിരെയാണ് ഗ്രൂപ്പില്‍ അവരുടെ അടുത്ത മത്സരം.