കോഴിക്കോട്: താലിബാനെതിരായ ഫേസ്ബുക്ക് പോസ്റ്റ് പിന്‍വലിച്ചില്ലെങ്കില്‍ ജോസഫ് മാഷിന്റെ അവസ്ഥ ഉണ്ടാകുമെന്ന മുന്നറിയിപ്പുമായി മുസ്ലിം ലീഗ് നേതാവ് ഡോ.എം.കെ മുനീറിന് ഭീഷണിക്കത്ത്. ടൈപ്പ് ചെയ്ത കത്ത് തപാലിലാണ് ലഭിച്ചത്. കടുത്ത ഭാഷയിലാണ് കത്തെന്നും പോലിസ് മേധാവിക്ക് കത്തിന്റെ പകര്‍പ്പ് സഹിതം പരാതി നല്‍കിയതായും എം.കെ മുനീര്‍ വാര്‍ത്താ സമ്മേളനത്തില്‍ പറഞ്ഞു.

എന്നാല്‍ താലിബാന്‍ വിരുദ്ധ നിലപാടില്‍ ഉറച്ചു നില്‍ക്കുകയാണ്. താലിബാന് മാറ്റം വന്നെന്ന് കരുതുന്നില്ല. തീവ്രവാദത്തിന് എതിരെ ഇനിയും നിലപാട് എടുക്കുമെന്നും പറഞ്ഞ മുനീര്‍ പോസ്റ്റ് പിന്‍വലിക്കാന്‍ തയ്യാറല്ലെന്നും വ്യക്തമാക്കി.