തിരുവനന്തപുരം: സ്വകാര്യ ആശുപത്രികള്‍ വഴി വാക്‌സിന്‍ വിതരണംചെയ്യാന്‍  മുഖ്യമന്ത്രിയുടെ ദുരിതാശ്വാസ നിധിയില്‍ നിന്ന് വീണ്ടും തുക  അനുവദിച്ച് സര്‍ക്കാര്‍. സിറം ഇന്‍സ്റ്റിറ്റ്യൂട്ടില്‍ നിന്ന് 10 ലക്ഷം ഡോസ്  കൊവിഷീല്‍ഡ് വാക്‌സിന്‍ വാങ്ങുന്നതിന് 63 കോടി രൂപയാണ്  അനുവദിച്ചത്. 

 

കേരള മെഡിക്കല്‍ സര്‍വിസസ് കോര്‍പറേഷന്‍ വഴി വാക്‌സിന്‍  വാങ്ങുന്നതിനാണ് ഇത്രയും തുക അനുവദിച്ച് ഈ മാസം 18ന് സര്‍ക്കാര്‍  ഉത്തരവിറക്കിയത്. നേരത്തെ സ്വകാര്യ ആശുപത്രികള്‍ക്ക് വാക്‌സിന്‍ വാങ്ങി  നല്‍കാനായി 126 കോടി രൂപ ദുരിതാശ്വാസ നിധിയില്‍ നിന്ന്  അനുവദിച്ചിരുന്നു. ഇതിനുപിന്നാലെയാണ് ഇപ്പോള്‍ വീണ്ടും തുക  അനുവദിച്ചിരിക്കുന്നത്. നിര്‍മാതാക്കളില്‍ നിന്ന് സ്വകാര്യ ആശുപത്രികള്‍  നിലവില്‍ 630 രൂപയ്ക്കാണ് നേരിട്ട് വാക്‌സിന്‍ വാങ്ങുന്നത്. ഇത് 150 രൂപ  കൂട്ടി 780 രൂപയ്ക്കാണ് ഇപ്പോള്‍ വിതരണം ചെയ്യുന്നത്. ഉത്തരവുപ്രകാരം സര്‍ക്കാര്‍  കേരള മെഡിക്കല്‍ സര്‍വിസസ് കോര്‍പറേഷന്‍ മുഖേന വാങ്ങുന്ന വാക്‌സിന്‍  സ്വകാര്യ ആശുപത്രികള്‍ക്ക് കൊടുക്കും. സ്വകാര്യ ആശുപത്രികള്‍ അതിന്റെ  തുക സര്‍ക്കാരിന് തിരിച്ചുനല്‍കും. പകരം ജനങ്ങള്‍ക്ക് വാക്‌സിന്‍  കുത്തിവയ്ക്കുമ്പോള്‍ സ്വകാര്യ ആശുപത്രികള്‍ പണം ഈടാക്കും.  ഫലത്തില്‍ വാക്‌സിന്‍ വാങ്ങിയതിന്റെ പണം സര്‍ക്കാരിന് ജനങ്ങള്‍ കൊടുക്കുകയെന്ന രീതിയാണ് ഇതുവഴിയുണ്ടാകുന്നത്. എന്നാല്‍, കഴിഞ്ഞ ബജറ്റില്‍ വാക്‌സിന്‍ വാങ്ങാനായി നീക്കിവച്ച ആയിരം കോടി രൂപയും വാക്‌സിന്‍  ചലഞ്ച് വഴി സമാഹരിച്ച തുകയും എങ്ങനെ വിനിയോഗിക്കുമെന്ന  ചോദ്യമാണ് പ്രതിപക്ഷം ഉയര്‍ത്തുന്നത്. സര്‍ക്കാര്‍ ആശുപത്രികളില്‍ വാക്‌സിന്‍ ലഭ്യത ഉറപ്പുവരുത്താന്‍ സംവിധാനമുണ്ടാക്കാതെ സ്വകാര്യ ആശുപത്രികള്‍ക്ക് വാക്‌സിന്‍  ലഭ്യമാക്കുന്ന നടപടിക്കെതിരേ പ്രതിഷേധമുയര്‍ന്നിട്ടുണ്ട്.