കാബൂള്‍: അഫ്ഗാന്‍ പൗരന്മാര്‍ രാജ്യം വിടരുതെന്നും സ്ത്രീകള്‍ പുറത്തിറങ്ങരുതെന്നും താക്കീതുമായി താലിബാന്‍. പൗരന്‍മാര്‍ക്ക് കാബൂള്‍ വിമാനത്താവളത്തിലേക്കു പോകാന്‍ അനുമതി നല്‍കില്ലെന്നും താലിബാന്‍ അറിയിച്ചു. ഇതിന്റെ ഭാഗമായി കാബൂള്‍ വിമാനത്താവളത്തിലെ ഒഴിപ്പിക്കല്‍ കോംപൗണ്ട് ഇന്നലെ അടച്ചു. 

സുരക്ഷാ കാരണങ്ങളാലാണിതെന്നു വിശദീകരിച്ച താലിബാന്‍ വക്താവ് സബീഹുല്ല മുജാഹിദ്, വിദേശികളെ കടത്തിവിടുമെന്നും അറിയിച്ചു. രാജ്യത്തെ സുരക്ഷാ സംവിധാനങ്ങള്‍ ശരിപ്പെടുന്നതുവരെ സര്‍ക്കാര്‍ ജോലിയുള്ള സ്ത്രീകള്‍ പുറത്തിറങ്ങരുതെന്നും വീടുകളില്‍ തന്നെ കഴിയണമെന്നും അവരുടെ ശമ്പളം മുടങ്ങില്ലെന്നും വ്യക്തമാക്കി.

രാജ്യത്തെ വിദഗ്ധതൊഴിലാളികളെ അമേരിക്ക കൊണ്ടുപോകുന്നതിനെതിരേ സബീഹുല്ല കഴിഞ്ഞദിവസം രംഗത്തുവന്നിരുന്നു. ഡോക്ടര്‍മാര്‍, എന്‍ജിനിയര്‍മാര്‍ തുടങ്ങിയ വിദഗ്ധരെ രാജ്യത്തിന് ആവശ്യമുണ്ട്. അവരെ കൊണ്ടുപോകരുതെന്ന് സബീഹുല്ല പറഞ്ഞു.  

 

അതിനിടെ ഈമാസം 31നു ശേഷം യു.എസ്, ബ്രിട്ടിഷ് സേനകള്‍ രാജ്യത്തു തുടരരുതെന്ന് താലിബാന്റെ മറ്റൊരു വക്താവായ സുഹൈല്‍ ഷഹീന്‍ മുന്നറിയിപ്പു നല്‍കി. ഈ സമയപരിധി തീരുമാനിച്ചത് യു.എസ് പ്രസിഡന്റ് ജോ ബൈഡനാണ്. അതിനുശേഷവും ഇവിടെ തുടര്‍ന്നാല്‍ അതിനര്‍ഥം അധിനിവേശം തുടരുന്നു എന്നാണ്. അതിന്റെ ആവശ്യമില്ല. അത് കനത്ത പ്രത്യാഘാതത്തിനിടവരുത്തുമെന്നും ഷഹീന്‍ പറഞ്ഞു.