ഒരു പെട്രോൾ പമ്പിൽ എന്തൊക്കെ സൗകര്യങ്ങൾ വേണം? പള്ളിയും കോഫീ ഷോപ്പും ടോയ്‌ലറ്റുമില്ലെങ്കിൽ കനത്ത പിഴയുമായി സഊദി

റിയാദ്: വൃത്തിയുള്ള ടോയ്‌ലറ്റുകൾ പരിപാലിക്കുന്നതിൽ പരാജയപ്പെടുന്ന പെട്രോൾ സ്റ്റേഷനുകൾക്ക് 2,500 റിയാൽ പിഴ ചുമത്തുമെന്ന് സഊദി മുനിസിപ്പൽ, ഗ്രാമീണ കാര്യ, ഭവന മന്ത്രാലയം. പെട്രോൾ സ്റ്റേഷന് സമീപം നമസ്കരിക്കാനുള്ള സൗകര്യം ഒരുക്കാത്തവർക്ക് 5,000 റിയാൽ പിഴ ഈടാക്കും. തിങ്കളാഴ്ച മുതൽ ഈ നിയമം പ്രാബല്യത്തിൽ വന്നു.

നിശ്ചിത മാനദണ്ഡങ്ങൾ അനുസരിച്ച് സ്റ്റേഷൻ പരിസരത്ത് പള്ളി/നമസ്കാര സ്ഥലം ഇല്ലെങ്കിൽ 5,000 റിയാൽ പിഴ ഈടാക്കും. മസ്ജിദ് നിർമ്മിച്ച് ഈ ലംഘനം സ്റ്റേഷനുകൾ പരിഹരിക്കൽ ആവശ്യമാണ്. മുനിസിപ്പൽ മാർഗ്ഗനിർദ്ദേശങ്ങൾ അനുസരിച്ച് ഗ്യാസ് സ്റ്റേഷനുകളിൽ കോഫി ഷോപ്പുകൾ പ്രവർത്തിപ്പിക്കുന്നതിൽ പരാജയപ്പെട്ടാൽ 5,000 റിയാൽ വരെ പിഴ ഈടാക്കും. റെസ്റ്റോറന്റുകൾ ഇല്ലാത്ത ഗ്യാസ് സ്റ്റേഷനുകൾക്ക് 5,000 റിയാൽ വരെ പിഴ ചുമത്തും.

പെട്രോൾ സ്റ്റേഷനുകളിൽ ടയർ കടകൾ ഇല്ലാതിരുന്നാൽ 1,000 മുതൽ 5,000 റിയാൽ വരെ പിഴ ചുമത്തും. ടോയ്‌ലറ്റുകളിലെ വെള്ളം ചോർന്നാൽ അല്ലെങ്കിൽ അവയ്ക്കുള്ളിൽ വൃത്തി ഇല്ലെങ്കിൽ ഇപ്പോൾ 2,500 റിയാൽ വരെ പിഴ ചുമത്താം. പെട്രോൾ സ്റ്റേഷനുകളിൽ മാലിന്യ പാത്രങ്ങൾ ഇല്ലെങ്കിലോ, അല്ലെങ്കിൽ ഉള്ളവ വൃത്തിയില്ലാത്തതോ ആണെങ്കിൽ 2,500 റിയാൽ വരെ പിഴയായി ചുമത്തും.

എല്ലാ പെട്രോൾ സ്റ്റേഷനുകളിലും നിലവാരമുള്ള സേവനവും ശുചിത്വവും ഉറപ്പാക്കുന്നതിനാണ് ഈ നടപടികൾ സ്വീകരിക്കുന്നതെന്ന് മന്ത്രാലയം വ്യക്തമാക്കി. സാമ്പത്തിക പിഴകൾ ഒഴിവാക്കുന്നതിനും പൊതുജനങ്ങൾക്ക് മെച്ചപ്പെട്ടതും ശുചിത്വമുള്ളതുമായ സേവനങ്ങൾ നൽകുന്നതിന് സ്ഥാപനങ്ങൾ ഈ നിയന്ത്രണങ്ങൾ കർശനമായി പാലിക്കാൻ മന്ത്രാലയം നിർദേശിച്ചു.