യുഎഇയിൽ മഴയും ഇടിമിന്നലും തുടരുന്നു; ഡ്രൈവർമാർക്കും താമസക്കാർക്കും ജാഗ്രത നിർദേശം

അബുദാബി: രാജ്യത്ത് മഴ ശക്തമായി തുടരുന്നതായി യുഎഇയുടെ നാഷണൽ സെന്റർ ഓഫ് മെറ്റീരിയോളജി അറിയിച്ചു. കഴിഞ്ഞ ദിവസം പല ഭാഗങ്ങളിലും വ്യത്യസ്ത അളവിലുള്ള മഴ റിപ്പോർട്ട് ചെയ്തു. കനത്ത മഴയിൽ നിരവധി റോഡുകൾ ഒലിച്ചുപോയതിനാൽ എമിറേറ്റുകളിൽ ഉടനീളം വാഹനമോടിക്കുന്നവർ ജാഗ്രത പാലിക്കണമെന്ന് അതോറിറ്റി അറിയിച്ചു.

മോശം കാലാവസ്ഥയെ തുടർന്ന് അബുദാബി പൊലിസ് അടിയന്തര നിർദ്ദേശം പുറപ്പെടുവിച്ചു. മഴക്കാലത്ത് വേഗത കുറച്ച് വാഹനമോടിക്കണമെന്ന് പൊലിസ് അറിയിച്ചു. മുൻകരുതൽ എന്ന നിലയിൽ മൊബൈൽ ഫോണുകളിൽ സൈറൺ അലേർട്ടുകൾ താമസക്കാർക്ക് അയച്ചു. തലസ്ഥാനത്തെ നിരവധി റോഡുകൾ വേഗത കുറയ്ക്കൽ സംവിധാനങ്ങൾ സജീവമാക്കിയിട്ടുണ്ട്.

കാലാവസ്ഥയിൽ ഏറ്റക്കുറച്ചിലുകൾ ഉണ്ടാകുമ്പോൾ (മരങ്ങൾ വീഴുകയോ വെള്ളം അടിഞ്ഞുകൂടുകയോ ലൈറ്റിംഗ് തൂണുകൾ വീഴുകയോ ചരിഞ്ഞ് വീഴുകയോ ചെയ്യുകയാണെങ്കിൽ) 993 എന്ന നമ്പറിൽ അബുദാബി സിറ്റി മുനിസിപ്പാലിറ്റിയിൽ ബന്ധപ്പെടണമെന്ന് അധികൃതർ അറിയിച്ചു.

കനത്ത മഴയും ഇടിമിന്നലും കൂടിയതായി കാലാവസ്ഥാ വകുപ്പ് റിപ്പോർട്ട് ചെയ്തിട്ടുണ്ട്. അനാവശ്യമായ ഡ്രൈവിംഗ് ഒഴിവാക്കാനും റോഡിൽ ജാഗ്രത പാലിക്കാനും ദൃശ്യപരത കുറയുന്ന സാഹചര്യത്തിൽ ലോ-ബീം ഹെഡ്‌ലൈറ്റുകൾ ഓണാക്കാനും അധികൃതർ അറിയിച്ചു.

അതേസമയം, ഇന്ന് ഷാർജയുടെ കിഴക്കൻ, മധ്യ മേഖലകളിലെ പർവതപ്രദേശങ്ങളിൽ ആലിപ്പഴത്തോടൊപ്പമുള്ള കനത്ത മഴ പ്രവചിക്കപ്പെടുന്നു, ഇത് അറേബ്യൻ ഗൾഫിന്റെ തീരപ്രദേശങ്ങളെയും അബുദാബി, അൽ ദഫ്ര, അൽ ഐൻ, കൂടാതെ പ്രദേശങ്ങളെയും ബാധിച്ചേക്കാം. റിപോർട്ടുകൾ അനുസരിച്ച് യുഎഇയിൽ അസ്ഥിരമായ കാലാവസ്ഥ തുടരാനാണ് സാധ്യത.