ന്യൂഡല്‍ഹി: കള്ളപ്പണം വെളുപ്പിക്കല്‍ കേസില്‍ കഴിഞ്ഞ മേയില്‍ അറസ്റ്റിലായ ആം ആദ്മി പാര്‍ട്ടി മന്ത്രി സത്യേന്ദര്‍ ജെയിന് ഡല്‍ഹി തിഹാര്‍ ജയിലില്‍ മസാജ് ചെയ്യുന്നതിന്റെ വിഡിയോ പുറത്തുവന്നു. ബി.ജെ.പി നേതാക്കളാണ് ദൃശ്യങ്ങള്‍ സമൂഹമാധ്യമങ്ങളില്‍ പങ്കുവച്ചത്. ജയിലില്‍ കഴിയുന്ന മന്ത്രിക്ക് വി.ഐ.പി പരിഗണന നല്‍കിയെന്നാരോപിച്ച് തിഹാര്‍ ജയില്‍ സൂപ്രണ്ട് അജിത് കുമാറിനെ സസ്‌പെന്‍ഡ് ചെയ്തതിന് തൊട്ടുപിന്നാലെയാണ് വിഡിയോ പുറത്തുവന്നത്.

ജെയ്‌നിനെ പാര്‍പ്പിച്ചിരിക്കുന്ന ജയില്‍ നമ്പര്‍ ഏഴിലെ സൂപ്രണ്ടിനെതിരേ ജയില്‍ മോചിതനായ സുകേഷ് ചന്ദ്രശേഖര്‍ എന്നയാളാണ് പരാതി ഉന്നയിച്ചത്. അനാവശ്യമായ ആനുകൂല്യങ്ങള്‍ നല്‍കിയെന്ന് ആരോപണത്തെ തുടര്‍ന്ന് ഡല്‍ഹി ലെഫ്റ്റനന്റ് ഗവര്‍ണര്‍ രൂപീകരിച്ച അന്വേഷണ സമിതിയുടെ ശുപാര്‍ശയിലാണ് നടപടി. ആരോപണങ്ങള്‍ അസംബന്ധവും അടിസ്ഥാനരഹിതവുമാണെന്ന് പറഞ്ഞ് ആം ആദ്മി പാര്‍ട്ടി തള്ളിക്കളഞ്ഞിരുന്നു.

So instead of Sazaa - Satyendra Jain was getting full VVIP Mazaa ? Massage inside Tihar Jail? Hawalabaaz who hasn’t got bail for 5 months get head massage !Violation of rules in a jail run by AAP Govt

This is how official position abused for Vasooli & massage thanks to Kejriwal pic.twitter.com/4jEuZbxIZZ

— Shehzad Jai Hind (@Shehzad_Ind) November 19, 2022

തിഹാര്‍ ജയിലിലെ സെല്ലില്‍ സത്യേന്ദര്‍ ജെയിന്‍ കാലും മുതുകും തലയും മസാജ് ചെയ്യുന്നതായി പുറത്തുവിട്ട വീഡിയോയില്‍ പറയുന്നു. ജയില്‍ ജീവനക്കാര്‍ക്കെതിരേ അധികൃതര്‍ നടപടി സ്വീകരിച്ചിട്ടുണ്ടെന്നും ഇപ്പോള്‍ പുറത്തുവന്നത് പഴയ വീഡിയോ ആണെന്നും തിഹാര്‍ ജയില്‍ വൃത്തങ്ങള്‍ പറയുന്നു. സത്യേന്ദര്‍ ജയിന് ജയിലില്‍ വി.വി.ഐ.പി പരിഗണന ലഭിച്ചെന്നും ഇങ്ങനെയൊരു മന്ത്രിയെ കെജ്‌രിവാള്‍ പുറത്താക്കുമോയെന്നും ബി.ജെ.പി നേതാവ് ഷെഹ്‌സാദ് ജയ് ഹിന്ദ് ട്വിറ്റ് ചെയ്തു.

സത്യേന്ദര്‍ ജെയിന് മസാജും പ്രത്യേക ഭക്ഷണവും ജയിലിനുള്ളില്‍ ലഭിച്ചിരുന്നതായി ഇ.ഡിക്ക് വേണ്ടി ഹാജരായ അഡീഷണല്‍ സോളിസിറ്റര്‍ ജനറല്‍ എസ്.വി രാജു നേരത്തേ കോടതിയെ അറിയിച്ചിരുന്നു.