തിരുവനന്തപുരം: സംസ്ഥാനത്ത് കൊവിഡ് രൂക്ഷമാകുന്ന സാഹചര്യത്തില്‍ മരുന്നുകളുടെ വില്‍പനയ്ക്ക് കടുത്ത നിയന്ത്രണങ്ങള്‍ ഏര്‍പ്പെടുത്തി ഡ്രഗ് കണ്‍ട്രോള്‍ വിഭാഗം.
പാരസെറ്റമോള്‍ വാങ്ങാന്‍ ഡോക്ടറുടെ കുറപ്പടി നിര്‍ബന്ധമാക്കി. ഡോക്ടര്‍മാരുടെ കുറിപ്പടിയില്ലാതെ പനി, ജലദോഷം, ചുമ എന്നീ അസുഖങ്ങള്‍ക്കുള്ള മരുന്നുകള്‍ നല്‍കരുതെന്ന് മെഡിക്കല്‍ സ്റ്റോറുകള്‍ക്ക് നിര്‍ദേശംനല്‍കി.
കൊവിഡ് ഒന്നാം തരംഗസമയത്തും വിവിധ മരുന്നുകള്‍ വില്‍പന നടത്തുന്നതിന് നിയന്ത്രണം ഏര്‍പ്പെടുത്തിയിരുന്നു. എന്നാല്‍ പിന്നീട് ഇളവു വരുത്തിയെങ്കിലും കൊവിഡ് ഉള്ളവര്‍ പനിയാണെന്നു കരുതി പാരസെറ്റമോള്‍ ഉള്‍പ്പെടെയുള്ള മരുന്നുകള്‍ കഴിച്ച് ശരീരോഷ്മാവ് കുറയുമ്പോള്‍ പുറത്തിറങ്ങി നടക്കുന്ന സാഹചര്യം കൂടി.
ഇത്തരത്തില്‍ പുറത്തിറങ്ങുന്നവര്‍ വഴി രോഗവ്യാപനം കൂടാനുള്ള സാധ്യതയേറെയാണെന്ന് ആരോഗ്യ വിദഗ്ധര്‍ കണ്ടെത്തിയിരുന്നു. നിയന്ത്രണം എല്ലാ മെഡിക്കല്‍ സ്റ്റോറുകളിലും നടപ്പാക്കുന്നുണ്ടോ എന്നറിയാന്‍ പരിശോധന കര്‍ശനമാക്കുമെന്നും ഡ്രഗ് കണ്‍ട്രോള്‍ വിഭാഗം അറിയിച്ചു.