'ഗസ്സയിലെ മാലാഖമാര്‍'; കൊല്ലപ്പെട്ട കുട്ടികളുടെ പേരുമായി ഇറാന്‍ പത്രം

ഗസ്സ: ഗസ്സയില്‍ കൊല്ലപ്പെട്ട 3,500 ത്തിലധികം കുട്ടികളുടെ പേരുമായി ഇറാന്‍ ദിനപത്രമായ തെഹ്‌റാന്‍ ടൈംസ്. ഗസ്സയിലെ മാലാഖമാര്‍ എന്ന തലക്കെട്ടിലാണ് പത്രം കുഞ്ഞുങ്ങളുടെ പേര് മാത്രം പ്രസിദ്ധീകരിച്ചത്. പേരിനു മുകളിലാണ് രക്തം ചിന്തുന്ന രീതിയിലുള്ള തലക്കെട്ട്. ആക്രമണത്തില്‍ നിന്ന് പിന്നോട്ടില്ലെന്ന ഇസ്‌റാഈല്‍ പ്രധാനമന്ത്രി ബെന്യാമിന്‍ നെതന്യാഹുവിന്റെ പ്രസ്താവന വന്നതിനു പിന്നാലെയാണ് തെഹ്‌റാന്‍ ടൈംസിന്റെ പ്രതിഷേധം.

ഇസ്‌റാഈല്‍ ഭീകരതയില്‍ കൊല്ലപ്പെട്ട നിഷ്‌കളങ്കരായ കുഞ്ഞുങ്ങളുടെ മുഖം ലോക മനസാക്ഷിയെ കീറി മുറിക്കുകയാണ്. ഗസ്സയില്‍ ഇസ്‌റാഈല്‍ ആക്രമണം തുടരുകയാണ്. കര,വ്യോമ,നാവിക സേന ഗസ്സയ്‌ക്കെതിരേ ആക്രമണം കടുപ്പിക്കുകയാണെന്നും ലേഖനത്തിലെ തുടക്കത്തില്‍ പറയുന്നു.

ഗസ്സയില്‍ കുടുങ്ങിപ്പോയ കുട്ടികള്‍ അതിജീവനത്തിനായി സമയത്തിനെതിരായ ഓട്ടത്തിലാണ്. എന്നാല്‍ അവരുടെ വേദനാജനകമായ ചിത്രങ്ങള്‍ സോഷ്യല്‍ മീഡിയയില്‍ പങ്കുവെക്കുന്നതിനപ്പുറം അവരുടെ ആസന്നമായ ദുരവസ്ഥയെ മറ്റെല്ലാവരും, പ്രത്യേകിച്ച് പാശ്ചാത്യ മുഖ്യധാരാ മാധ്യമങ്ങള്‍ അവഗണിക്കുന്നതായാണ് മനസ്സിലാവുന്നത്. മനുഷ്യാവകാശങ്ങളുടെ സ്വയം പ്രഖ്യാപിത ചാമ്പ്യന്‍മാരായ പ്രമുഖ അമേരിക്കന്‍ മാധ്യമങ്ങള്‍ പോലും, കഴിഞ്ഞ 24 ദിവസങ്ങളില്‍ പലസ്തീന്‍ കുട്ടികള്‍ അനുഭവിച്ച ദുരിതങ്ങളേക്കാള്‍ ഇസ്‌റാഈലി വളര്‍ത്തുമൃഗങ്ങളുടെ വിഢിത്തങ്ങള്‍ സംപ്രേഷണം ചെയ്യാന്‍ ഇഷ്ടപ്പെടുന്നു.

കഴിഞ്ഞ നാലുവര്‍ഷത്തിനിടെ ലോകത്ത് മുഴുവനായി കൊല്ലപ്പെട്ട കുട്ടികളേക്കാള്‍ കൂടുതല്‍ കുട്ടികള്‍ കഴിഞ്ഞ മൂന്നാഴ്ചക്കിടെ ഗസ്സയില്‍ കൊല്ലപ്പെട്ടതായി ഫലസ്തീനിലെ സേവ് ദ ചില്‍ഡ്രന്‍ എന്ന സംഘടന ചൂണ്ടിക്കാട്ടിയിരുന്നു. ഗസ്സയില്‍ പൊലിഞ്ഞ കുഞ്ഞുങ്ങള്‍ ലോകത്തിന് തീരാവേദനയാണ്. ഗസ്സയിലെ കുട്ടികള്‍ കൂടുതല്‍ ഭയാനകമായ യാഥാര്‍ത്ഥ്യത്തെ അഭിമുഖീകരിച്ചുകൊണ്ടിരിക്കുകയാണ്. അത് ദൈനംദിന ജീവിതത്തെ പേടിസ്വപ്‌നമാക്കി മാറ്റിയെന്നും ലേഖനം പറയുന്നു. ഇസ്‌റാഈലിന് അമേരിക്ക നല്‍കുന്ന പിന്തുണയെ വിമര്‍ശിക്കുന്നതോടൊപ്പം ഫലസ്തീനോടുള്ള അറബ് രാജ്യങ്ങളുടെ നിസ്സംഗ സമീപനത്തെ കുറ്റപ്പെടുത്തുകയും ചെയ്യുന്നുണ്ട് ലേഖനത്തില്‍.

Angels of Gaza