തൃശൂര്‍: ശ്രീ നാരായണ ഗ്ലോബല്‍ മിഷന്റെ ആഭിമുഖ്യത്തില്‍ ജില്ലയില്‍ നിന്നുള്ള മന്ത്രിമാരായ എ.സി മൊയ്തീന്‍, പ്രൊഫ. സി.രവീന്ദ്രനാഥ്, വി.എസ് സുനില്‍ കുമാര്‍ എന്നിവര്‍ക്ക് സ്വീകരണം നല്‍കുമെന്ന് ഭാരവാഹികള്‍ വാര്‍ത്താ സമ്മേളനത്തില്‍ അറിയിച്ചു. നാളെ വൈകുന്നേരം 2.30ന് തിരുവമ്പാടി കണ്‍വന്‍ഷന്‍ സെന്ററില്‍ നടക്കുന്ന സംഗമത്തില്‍ ഗ്ലോബല്‍ മിഷന്‍ സംസ്ഥാന പ്രസിഡന്റും മാതൃഭൂമി മാനേജിങ് എഡിറ്ററുമായ പി വി ചന്ദ്രന്‍ മന്ത്രിമാരെ പൊന്നാട ചാര്‍ത്തി ആദരിക്കും.
സമ്മേളനത്തില്‍ സാമൂഹിക വിപത്തുകള്‍ക്കെതിരെയുള്ള സംസ്ഥാന ബോധവത്കരണ ക്യാംപ് മന്ത്രി എ സി മൊയ്തീനും നമുക്ക് ജാതിയില്ല കണ്‍വന്‍ഷന്‍ മന്ത്രി വി എസ് സുനില്‍ കുമാറും മയക്കുമരുന്ന് വിരുദ്ധ ബോധവത്കരണത്തിന്റെ സംസ്ഥാനതല ഉദ്ഘാടനം മന്ത്രി പ്രൊഫ. സി.രവീന്ദ്രനാഥും ഉദ്ഘാടനം ചെയ്യും. ബ്രഹ്മശ്രീ സ്വാമി ഗുരുരത്‌നം ജ്ഞാനതപസ്വി ശ്രീനാരായണ ധര്‍മ പ്രഭാഷണം നടത്തും. ഡോ. മാര്‍ അപ്രേം മെത്രോപ്പോലിത്ത പ്രഭാഷണം നടത്തും. വാര്‍ത്താ സമ്മേളനത്തില്‍ ടി.ആര്‍ വിജയകുമാര്‍, കെ.ആര്‍ ബാല സുബ്രഹ്മണ്യന്‍, കെ.യു വേണുഗോപാല്‍, മണികണ്ഠന്‍ വാലത്ത് സംബന്ധിച്ചു.