കോഴിക്കോട്: ലൗജിഹാദും നാര്‍ക്കോട്ടിക് ജിഹാദും കത്തി നില്‍ക്കുന്നതിനിടെ അതിതീവ്രമുസ്‌ലിം വിരുദ്ധതയുമായി താമരശ്ശേരി അതിരൂപത. വിദ്യാര്‍ത്ഥികള്‍ക്കായി അതിരൂപത പുറത്തിറക്കിയ വേദപാഠ പുസ്തകത്തിലാണ് തീവ്ര മുസ്‌ലിം വിരുദ്ധതയും വിദ്വേഷവും കുപ്രചരണങ്ങളും കുത്തിനിറച്ചിരിക്കുന്നത്.

'സത്യങ്ങളും വസ്തുതകളും 33 ചോദ്യോത്തരങ്ങളിലൂടെ' എന്ന പേരിലാണ് താമരശേരി അതിരൂപത വിശ്വാസ പരിശീലന കേന്ദ്രം 130ലേറെ പേജ് വരുന്ന പുസ്തകം പുറത്തിറക്കിയിരിക്കുന്നത്.

നാല് ഭാഗങ്ങളായി തിരിച്ചിട്ടുള്ള വേദപാഠ പുസ്തകത്തില്‍ ഇസ്‌ലാമിനും മുസ്‌ലിങ്ങള്‍ക്കുമെതിരായ പരാമര്‍ശങ്ങള്‍ മാത്രമാണുള്ളത്. 13ാം പേജില്‍ അല്ലാഹുവിന്റെ സ്വഭാവം എന്നൊരു ഭാഗമുണ്ട്. അതില്‍ അല്ലാഹുവിന് സാത്താന്റെ സ്വഭാവമാണെന്നും അല്ലാഹു മുസ്‌ലിങ്ങളെ മാത്രമാണ് സ്‌നേഹിക്കുന്നതെന്നും പറയുന്നു.

'ക്രിസ്ത്യാനികളേയും ബഹുദൈവ വിശ്വാസികളേയും കൊല്ലുന്നവര്‍ക്ക് അല്ലാഹു സ്വര്‍ഗം കൊടുക്കും. അവരെ കൊല്ലാനായി ചാവേറായി മരിക്കുന്നവര്‍ക്ക് സ്വര്‍ഗത്തില്‍ ഉന്നത സ്ഥാനം കൊടുക്കും. ഇതാണ് ചാവേര്‍ ആക്രമണങ്ങളുടെ പിന്നിലുള്ള വിശ്വാസ പ്രമാണം' എന്നൊക്കെയുള്ള തെറ്റിദ്ധാരണാ പ്രചരണങ്ങളും ഈ ഭാഗത്തിലുണ്ട്.

ലൗ ജിഹാദ് കുപ്രചരണത്തിനായി നിരവധി പേജുകളാണ് പുസ്തകത്തില്‍ മാറ്റിവച്ചിരിക്കുന്നത്. മൂന്നാം ഭാഗത്തിലെ 30ാം ചോദ്യമായ എന്താണ് 'ജിഹാദ്' എന്ന വിശുദ്ധ യുദ്ധം' എന്നതില്‍ തുടങ്ങി, നാലാം ഭാഗത്തിലെ 31ാം ചോദ്യമായ 'പ്രണയക്കെണികള്‍ ഒരുക്കുന്നത് എങ്ങനെ?, 32 'പ്രണയക്കെണികളില്‍ വീഴാതിരിക്കാനുള്ള മുന്‍കരുതല്‍ എന്തെല്ലാം' എന്നീ ഉപതലക്കെട്ടുകള്‍ക്ക് കീഴിലാണ് ലൗ ജിഹാദിനെ കുറിച്ച് പ്രതിപാദിക്കുന്നത്.

മതവ്യാപനം ലക്ഷ്യമാക്കി വിവിധതരം ജിഹാദുകള്‍ മുസ്‌ലിം തീവ്രവാദികള്‍ ഉപയോഗിക്കുന്നുണ്ടെന്നും അവയില്‍ ഏറ്റവും പ്രധാനപ്പെട്ടതാണ് ലൗ ജിഹാദ് എന്നുമാണ് പുസ്തകം പറയുന്നത്. അമുസ്‌ലിങ്ങളായ സ്ത്രീകളെയും പെണ്‍കുട്ടികളേയും പ്രേമം നടിച്ച് വശീകരിച്ച് വിവാഹം കഴിക്കുന്ന തന്ത്രമാണിത്. ഇതിനായി മുസ്‌ലിം യുവാക്കളേയും യുവതികളേയും പ്രത്യേക പരിശീലനം നല്‍കി സജ്ജമാക്കുന്നു. മനഃശാസ്ത്രപരവും ബൗദ്ധികവും വൈകാരികവുമായ മാര്‍ഗത്തിലൂടെ പദ്ധതികള്‍ മെനയുന്നു. ഒമ്പത് ഘട്ടങ്ങളിലൂടെയാണ് മുസ്‌ലിങ്ങള്‍ ലൗ ജിഹാദ് (പ്രണയക്കെണി) നടപ്പാക്കുന്നത് എന്ന് അക്കമിട്ടു നിരത്തി പറയുന്നുമുണ്ട് പുസ്തകത്തില്‍.

1 പെണ്‍കുട്ടിയെ തെരഞ്ഞെടുക്കല്‍ 2 പരിചയപ്പെടല്‍ 3 ബന്ധം ദൃഢമാക്കല്‍ 4 വിവാഹത്തെ കുറിച്ചുള്ള ധാരണകള്‍ 5 വിവാഹ വാഗ്ദാനം, കൈവിഷം അഥവാ ഓതിക്കെട്ടല്‍ 6 ലൈംഗിക ബന്ധം, ദുരുപയോഗം ചെയ്യല്‍ (ഇതിന് തയാറായില്ലെങ്കില്‍ മയക്കുമരുന്ന് നല്‍കി പീഡിപ്പിക്കുന്നു, മോര്‍ഫിങ് ചിത്രങ്ങള്‍ കാട്ടി ഭീഷണിപ്പെടുത്തുന്നു), 7 കുടുംബത്തില്‍ നിന്ന് അകറ്റുന്നു, സമൂഹത്തിലെ വില കളയുന്നു 8 നിയമപരമായി സ്വന്തമാക്കുക 9വിവാഹ ജീവിതം, മതം മാറ്റം എന്നിവയാണ് താമരശേരി രൂപത പറയുന്ന ഒമ്പതു ഘട്ടങ്ങള്‍.

'ഇങ്ങനെ മതംമാറ്റിയാല്‍ ജിഹാദിക്കും കുടുംബത്തിനും മഹല്ലില്‍ നിന്നും ഇസ്‌ലാമിക സംഘടനകളില്‍ നിന്നും വലിയ തുക പ്രതിഫലം ലഭിക്കും', 'അന്യ മതസ്ഥയായ ഒരു പെണ്‍കുട്ടിയെ ലൈംഗികമായി ഉപയോഗിക്കുന്നതോ ചതിക്കുന്നതോ നശിപ്പിക്കുന്നതോ ഇസ്‌ലാം തത്വപ്രകാരം ഒരു തിന്മയല്ല, പുണ്യമാണ്, സ്വര്‍ഗത്തിലെത്താനുള്ള വഴിയാണ്' എന്നിവയാണ് പുസ്തകത്തില്‍ പറയുന്ന മറ്റ് രണ്ട് പച്ചക്കള്ളങ്ങള്‍. ഇസ്‌ലാമില്‍ വ്യഭിചാരത്തിന് ശിക്ഷ നരകമാണെന്നും വ്യഭിചാരികളെ എറിഞ്ഞു കൊല്ലണമെന്നും പറയുന്നത് എന്നിരിക്കെയാണ് ഈ പ്രചാരണം.

ശേഷം, ലൗ ജിഹാദ് തിരിച്ചറിയാന്‍ ആറ് മാര്‍ഗങ്ങളും അതില്‍ വീഴാതിരിക്കാനുള്ള മുന്‍കരുതലുകളുമൊക്കെ പുസ്തകത്തില്‍ ഉള്‍പ്പെടുത്തിയിട്ടുണ്ട്. ഏറ്റവും ഒടുവിലായി ഒരു ക്രിസ്ത്യാനി ആയിരിക്കുന്നതിലെ മഹത്വം എന്താണെന്നും പുസ്തകം വിവരിക്കുന്നു.

സുപ്രിം കോടതിയും ഹൈക്കോടതിയും കേന്ദ്രസംസ്ഥാന സര്‍ക്കാരുകളും എന്‍ഐഎയും കേരളാ പൊലിസും ഡിജിപിയുമെല്ലാം ഇല്ലെന്ന് വ്യക്തമാക്കിയ സംഘ്പരിവാര്‍ കുപ്രചരണമാണ് ലൗ ജിഹാദ്. എന്നിട്ടും പ്രസംഗങ്ങളിലൂടെയും മറ്റും ബിഷപ്പുമാരും വിവിധ വൈദികരും നടത്തുന്ന മുസ്‌ലിം വിരുദ്ധവിദ്വേഷ വാദങ്ങള്‍ പുസ്തക രൂപത്തിലാക്കി ആധികാരികമായ രീതിയില്‍ താമരശേരി അതിരൂപത കുട്ടികളെ പഠിപ്പിക്കുകയാണ്. താമരശേരി രൂപതയുടെ കീഴില്‍ 119 ഇടവകകളാണ് ഉള്ളത്. ഇവിടങ്ങളിലായി ആയിരക്കണക്കിന് കുട്ടികളാണ് പങ്കെടുക്കുന്നത്. ഞായറാഴ്ചകള്‍ തോറും പ്ലസ് വണ്‍, പ്ലസ് ടു വിദ്യാര്‍ഥികള്‍ക്കായാണ് പള്ളികള്‍ കേന്ദ്രീകരിച്ച് രൂപത വേദപാഠ ക്ലാസുകള്‍ നല്‍കുന്നത്.