കണ്ണൂരില്‍ സ്വകാര്യ ബസ് കാല്‍നട യാത്രക്കാരനെ ഇടിച്ചു, ഇറങ്ങിയോടിയ ഡ്രൈവര്‍ ട്രെയിന്‍ തട്ടി മരിച്ചു

കണ്ണൂര്‍: കാല്‍നടയാത്രക്കാരനെ ഇടിച്ചതിനു പിന്നാലെ ഭയന്ന് ഇറങ്ങിയോടിയ ബസ് ഡ്രൈവര്‍ ട്രെയിന്‍ തട്ടി മരിച്ചു. പന്ന്യന്നൂര്‍ സ്വദേശി പുതിയവീട്ടില്‍ കെ.ജീജിത്ത് (45) ആണ് മരിച്ചത്. തലശേരി പുന്നോല്‍ പെട്ടിപ്പാലത്ത് ശനിയാഴ്ച വൈകിട്ട് 6.15നാണ് സംഭവം. വടകര തലശ്ശേരി റൂട്ടില്‍ ഓടുന്ന 'ഭഗവതി' ബസാണ് അപകടത്തില്‍പ്പെട്ടത്.

വടകര ഭാഗത്തുനിന്നും തലശേരി ഭാഗത്തേക്കു വരികയായിരുന്ന ബസ്, പെട്ടിപ്പാലം പഴയ കള്ളുഷാപ്പിനു സമീപത്തുവച്ച് റോഡില്‍കൂടി നടന്നുപോകുകയായിരുന്ന മുനീര്‍ എന്നയാളെ ഇടിച്ചു. അപകടത്തിനു പിന്നാലെ ജനക്കൂട്ടത്തിന്റെ ആക്രമണം ഭയന്ന് ഇറങ്ങിയോടിയ ജീജിത്തിനെ, സമീപത്തെ റെയില്‍വേ ട്രാക്കിലൂടെയെത്തിയ ട്രെയിന്‍ ഇടിക്കുകയായിരുന്നു.

ആളുകള്‍ ഓടിക്കൂടിയെങ്കിലും ജീജിത്ത് തല്‍ക്ഷണം മരിച്ചിരുന്നു. മൃതദേഹം ജനറല്‍ ആശുപത്രി മോര്‍ച്ചറിയിലേക്കു മാറ്റി. പരുക്കേറ്റ മുനീറിനെ ആശുപത്രിയില്‍ പ്രവേശിപ്പിച്ചു.