തളിപ്പറമ്പ് ;കുടിയാന്‍മലയില്‍ പൊലിസിന്റെ ലഹരി വേട്ട. മാരക മയക്കുമരുന്നായ എം.ഡി.എം.എയുമായി 2 യുവാക്കള്‍ പിടിയിലായി. മലയോരത്ത് യുവാക്കള്‍ക്കും വിദ്യാര്‍ഥികള്‍ക്കുമിടയില്‍ മയക്കുമരുന്ന് വില്‍പ്പന നടത്തുന്ന സംഘത്തിലെ അംഗങ്ങളായ മിഡിലാക്കയത്തെ പി ജസ്റ്റിന്‍ മാത്യു, മണ്ണംകുണ്ടിലെ പി.ജോബിന്‍ ജോസഫ് എന്നിവരാണ് പൊലിസിന്റെ പിടിയിലായത്. രഹസ്യ വിവരത്തെ തുടര്‍ന്ന് കണ്ണൂര്‍ റൂറല്‍ ജില്ലാപൊലിസ് മേധാവിയുടെ നിര്‍ദ്ദേശപ്രകാരം നാര്‍കോട്ടിക് ഡിവൈ.എസ്.പിയുടെ നേതൃത്വത്തിലുള്ള ലഹരിവിരുദ്ധ സ്‌ക്വാഡ് കുടിയാന്‍മല പൊലിസിന്റെ സഹായത്തോടെ നടത്തിയ പരിശോധനയിലാണ് മയക്കുമരുന്ന് പിടികൂടിയത്.ഇവരില്‍ നിന്ന് കണ്ടെടുത്ത 2.9 ഗ്രാം എം.ഡി.എം.എയും ഇവര്‍ സഞ്ചരിച്ച ബൈക്കും പൊലിസ് കസ്റ്റഡിയിലെടുത്തു.

മലയോര മേഖലയില്‍ പെട്ട കുടിയാന്മല, ചെമ്പേരി എന്‍ജിനീയറിംഗ് കോളജ് പരിസരം, ചേപ്പറമ്പ, ശ്രീകണ്ഠാപുരം എന്നിവിടങ്ങളില്‍ യുവാക്കള്‍ക്കും വിദ്യാര്‍ത്ഥികള്‍ക്കും മയക്കുമരുന്ന് വിതരണം ചെയ്യാനെത്തിയതായിരുന്നു ഇരുവരും. സര്‍ജറി അസിസ്റ്റന്റ് ആയി ജോലി ചെയ്തു വരുന്ന ആളാണ് പിടിയിലായ ജസ്റ്റിന്‍ മാത്യു.ഇവര്‍ മംഗലാപുരത്തു നിന്നും ആണ് വന്‍തോതില്‍ എം.ഡി.എം.എ വാങ്ങി നാട്ടില്‍ എത്തിക്കുന്നതെന്നു ചോദ്യം ചെയ്യലില്‍ വ്യക്തമായതായി പൊലിസ് പറഞ്ഞു. ഇരിട്ടി കൂട്ടുപുഴയിലെ പൊലിസിന്റെ ലഹരി വേട്ടക്കു ശേഷം കണ്ണൂര്‍ റൂറലില്‍ നടന്ന പ്രധാന ലഹരി വേട്ടയാണിത്. കുടിയാന്‍മല പൊലിസ് സ്റ്റേഷനിലെ സര്‍ക്കിള്‍ ഇന്‍സ്‌പെക്ക്ടര്‍ മെല്‍ബിന്‍ ജോസും, എസ്.ഐ എന്‍.ജെ ജോസ്, എ.എസ്.ഐ അബ്ദുള്‍ നാസര്‍, സീനിയര്‍ സി.പി.ഒമാരായ ജാബിര്‍, സുഭാഷ് എന്നിവരാണ് പരിശോധനക്ക് നേതൃത്വം നല്‍കിയത്.