ആലപ്പുഴ: കേരളത്തിന്റെ നൊമ്പരമായി കുഞ്ഞ് ദേശീയ താരം നിദഫാത്തിമയുടെ വേർപാട്. നാഗ്പൂരിൽ ദേശീയ സൈക്കിൾ പോളോ ചാംപ്യൻഷിപ്പിനെത്തി ആകസ്മികമായി വിട പറഞ്ഞ കേരളാ ടീം അംഗം അമ്പലപ്പുഴ കാക്കാഴം സുഹ്‌റാ മൻസിൽ ഷിഹാബുദീൻ അൻസില ദമ്പതികളുടെ മകൾ നിദ ഫാത്തിമ (10)യുടെ ചിത്രമായിരുന്നു ഇന്നലെ സാമൂഹിക മാധ്യമങ്ങൾ നിറയെ. നാഗ്പൂരിൽ മതിയായ ഭക്ഷണ, താമസ സൗകര്യങ്ങൾ ലഭിക്കാതിരുന്നതാണ് ഈ പത്തുവയസുകാരിയുടെ ജീവനെടുത്തതെന്ന ആക്ഷേപമാണ് ഉയരുന്നത്.

നീർക്കുന്നം എസ്.ഡി.വി.ഗവ.യു.പി സ്‌കൂളിലെ അഞ്ചാം ക്ലാസ് വിദ്യാർഥിനിയായ നിദ ഫാത്തിമ അമ്പലപ്പുഴ ഗവ.മോഡൽ സ്‌കൂളിലാണ് സൈക്കിൾ പോളോ പരിശീലിച്ചിരുന്നത്. കാക്കാഴത്ത് വാടക വീട്ടിലാണ് കുടുംബം കഴിയുന്നത്. പത്താം വയസിൽ ദേശീയ താരമായ നിദയിൽ വലിയ പ്രതീക്ഷകളായിരുന്നു കുടുംബത്തിന്.കടുത്ത നിയമ പോരാട്ടങ്ങൾക്കൊടുവിലാണ് നാഗ്പൂരിൽ നടക്കുന്ന ദേശീയ സൈക്കിൾ പോളോ ചാംപൻഷിപ്പിൽ പങ്കെടുക്കാൻ ഞായറാഴ്ച യാത്രതിരിച്ചത്. 20ന് നാഗ്പൂരിൽ എത്തിയെങ്കിലും താമസ, ഭക്ഷണ സൗകര്യങ്ങൾ സംഘാടകർ നിഷേധിച്ചതോടെ താൽകാലിക കേന്ദ്രത്തിലാണ് നിദയടക്കമുള്ള കേരളത്തിലെ മത്സരാർഥികൾ കഴിഞ്ഞിരുന്നത്.

ബുധനാഴ്ച കടയിൽ നിന്ന് ഭക്ഷണം കഴിച്ച ശേഷം കടുത്ത ഛർദ്ദിയെ തുടർന്ന് നാഗ്പൂരിലെ ശ്രീകൃഷ്ണ ആശുപത്രിയിലെത്തിച്ചു. ഇവിടെ നിന്ന് ഒരു ഇഞ്ചക്ഷൻ നൽകിയ ശേഷം ആരോഗ്യ നില കൂടുതൽ വഷളായെന്ന് കൂടെയുള്ള പരിശീലകർ പറയുന്നു. തുടർന്ന് ഐ.സി.യു.വിലേക്ക് മാറ്റുകയായിരുന്നു. തുടർന്നാണ് കുട്ടിയുടെ മരണം സ്ഥിരീകരിച്ചത്. കേരളത്തിൽ നിന്ന് രണ്ട് അസോസിയേഷനുകൾ കുട്ടികളെ മത്സരത്തിനയച്ചിരുന്നു.

സൈക്കിൾ പോളോ അസോസിയേഷൻ ഓഫ് കേരളയുടെ കുട്ടികളെയാണ് ഫെഡറേഷൻ മത്സരത്തിന് അനുവദിച്ചത്. നിദയടക്കമുള്ളവരെ അയച്ച കേരളാ സൈക്കിൾ പോളോ അസോസിയേഷൻ കോടതി ഉത്തരവ് വാങ്ങിയാണ് മത്സരത്തിനെത്തിയത്. മത്സരിപ്പിക്കാൻ മാത്രമാണ് കോടതി ഉത്തരവിട്ടതെന്നും മറ്റ് സൗകര്യങ്ങൾ തരില്ലെന്നും സംഘാടകർ പറഞ്ഞതായാണ് ആരോപണം. ഇതോടെ താൽക്കാലിക സൗകര്യങ്ങൾ സ്വന്തം നിലയ്ക്ക് ഏർപ്പാടാക്കുകയായിരുന്നു. അസോസിയേഷനുകൾ തമ്മിലുള്ള കിടമത്സരത്തിൽ പൊലിഞ്ഞത് വിലപ്പെട്ട കുഞ്ഞു ജീവനാണ്.

അതേ സമയം നിദഫാത്തിമ നടന്നാണ് ആശുപത്രിയിലേക്ക് വന്നതെന്ന് നാഗ്പുർ കേരള സമാജം ഭാരവാഹി മനോജ് ആയൂർ മാധ്യമങ്ങളോട് പറഞ്ഞു. രാവിലെ ആശുപത്രിയിലേക്ക് നടന്നുവന്നെന്നും ചികിത്സയ്ക്കിടെ നില വഷളായി പെട്ടെന്ന് കുഴഞ്ഞുവീണ് മരണം സംഭവിച്ചെന്നുമാണ് ഒപ്പമുണ്ടായിരുന്നവർ പറഞ്ഞതെന്നും കേരള സമാജം ജനറൽ സെക്രട്ടറിയായ മനോജ് ആയൂർ പ്രതികരിച്ചു.

നാഗ്പൂരിലെ മെഡിക്കൽ കോളജിലാണ് നിദ ഫാത്തിമയുടെ പോസ്റ്റുമോർട്ടം. ഇതിന് ശേഷമേ മരണകാരണം സ്ഥിരീകരിക്കാനാവു. പോസ്റ്റുമോർട്ടം നടപടികൾ പൂർത്തിയാക്കിയ ശേഷം മൃതദേഹം ഇന്ന് തന്നെ വീട്ടിലെത്തിക്കാനാണ് ശ്രമം.