കോഴിക്കോട് പ്രമുഖ വസ്ത്രവ്യാപാര ശ്രംഖലയുടെ കോഴിക്കോടെ നിര്‍മ്മാണത്തിലിരുന്ന കെട്ടിടത്തിലെ സ്ലാബ് തകര്‍ന്ന് വീണ് രണ്ട് മരണം . അപകടത്തില്‍ മറ്റ് രണ്ട് പേര്‍ക്ക് പരിക്കേറ്റിറ്റുണ്ട്. കോഴിക്കോട് പൊറ്റമ്മലിനടുത്ത് തൊണ്ടയാട് ജംഗ്ഷന് സമീപമുള്ള കല്യാണ്‍ സില്‍ക്‌സിന്റെ നിര്‍മ്മാണത്തിലിരുന്ന കെട്ടിടത്തിലാണ് സംഭവം.തമിഴ്‌നാട് സ്വദേശികളായ കാര്‍ത്തിക് , സലീം എന്നിവരാണ് മരിച്ചത്. കാര്‍ത്തിക് സംഭവം നടന്നയുടനും സലീം ആശുപത്രിയില്‍ ചികില്‍സയിലിരിക്കെ ആശുപത്രിയില്‍ വച്ചുമാണ് മരിച്ചത്. പരിക്കേറ്റ മറ്റു രണ്ട് തൊഴിലാളികളും തമിഴ്നാട് സ്വദേശികളാണ്. അപകടം നടന്ന സ്ഥലം കോഴിക്കോട് സിറ്റി ഡി.സി.പി സ്വപ്നില്‍ മഹാജന്‍ സന്ദര്‍ശിച്ചു. സംഭവത്തില്‍ കേസെടുത്തതായി അദ്ദേഹം അറിയിച്ചു. അപകട സമയത്ത് മരിച്ച കാര്‍ത്തിക്കടക്കം അഞ്ച് പേരാണ് ഇവിടെയുണ്ടായിരുന്നത്. അപകടമുണ്ടാകാന്‍ ഇടയായ കാരണത്തെ കുറിച്ച് പരിശോധിക്കുമെന്നും ഡി.സി.പി പറഞ്ഞു മൂന്നാം നിലയില്‍ ബീം ക്രെയിന്‍ ഉപയോഗിച്ച് സ്ഥാപിക്കുന്നതിനിടെയാണ് അപകടം. സ്ഥലത്തെത്തിയ മാധ്യമപ്രവര്‍ത്തകരെയടക്കം കെട്ടിട പരിസരത്ത് നിന്ന് ഒഴിപ്പിച്ചു.