ഒരു സംഘം ഉറുമ്പുകള്‍ രാവിലെ തന്നെ യാത്ര ആരംഭിച്ചു. പതിവുവഴിയില്‍ നിന്ന് വ്യതിചലിച്ച് അവര്‍ എത്തിച്ചേര്‍ന്നത് ഒരു വെളുത്ത കടലാസിലാണ്. 

കടലാസില്‍ ഒരാള്‍ കാലിഗ്രഫി ചെയ്തുകൊണ്ടിരിക്കുകയായിരുന്നു. മനോഹരങ്ങളായ അക്ഷരങ്ങള്‍ കടലാസില്‍ രൂപപ്പെട്ടുകൊണ്ടിരുന്നു. ഇതു കാണാനിടയായ ഒരു കുഞ്ഞനുറമ്പ് ആശ്ചര്യപൂര്‍വം പറഞ്ഞു: 'എത്ര മനോഹരം! ഭംഗിയേറിയ ഈ രൂപങ്ങള്‍ ഒരു പേനയുടെ സൃഷ്ടിയാണ്. ഇത്ര ചന്തമുളള രൂപങ്ങള്‍ ഇതിനു മുമ്പ് ഞാന്‍ കണ്ടിട്ടില്ല'.

 

അതുകേട്ട് യുവാവായ ഒരു ഉറുമ്പ് പറഞ്ഞു: 'പേനയല്ല, പേന പിടിച്ച വിരലുകളാണ് ഈ രൂപങ്ങള്‍ സൃഷ്ടിക്കുന്നത്'.

'നിങ്ങള്‍ രണ്ടുപേര്‍ പറഞ്ഞതും ശരിയല്ല'- മുതിര്‍ന്ന ഒരു ഉറുമ്പ് ഇടപ്പെട്ടു. 'ഈ രൂപങ്ങള്‍ സൃഷ്ടിക്കുന്നത് കൈയാണ്. എല്ലിലെ വിരലിന് എങ്ങനെയാണ് ഇത്ര മനോഹരമായ ഒരു രൂപം ഉണ്ടാക്കാനാവുക?'.

ക്രമേണ കൂടുതല്‍ ഉറുമ്പുകള്‍ ആ സംഭാഷണത്തില്‍ പങ്കാളികളായി. പലരും ആവേശപൂര്‍വം പല അഭിപ്രായങ്ങളും മുന്നോട്ടുവച്ചു. എല്ലാം കേട്ട ശേഷം ഉറുമ്പുകളുടെ നേതാവ് പ്രസ്താവിച്ചു: 'ഏതെങ്കിലും ഒരു വസ്തുവാണ് ഇവ സൃഷ്ടിക്കുന്നത് എന്ന് വിചാരിക്കരുത്. കാരണം എല്ലാ വസ്തുക്കളും കാലക്രമത്തില്‍ നശിച്ചുപോവും. രൂപങ്ങള്‍ പിറവിയെടുക്കുന്നത് ബുദ്ധിയില്‍ നിന്നും ചൈതന്യത്തില്‍ നിന്നുമാണ്.

ബുദ്ധിക്കും ചൈതന്യത്തിനും അപ്പുറം ദൈവം എന്ന ഒരു പരമസത്യം ഉണ്ടെന്നും ആ പരംപൊരുളില്‍ നിന്നാണ് എല്ലാറ്റിന്റെയും പിറവി എന്നും ആ നേതാവിനും അറിയുമായിരുന്നില്ല.