ഡിസംബര്‍ എത്തിയതോടെ രാജ്യത്താകമാനം മഞ്ഞുകാലം അതിന്റെ രൂക്ഷതയിലേക്ക് എത്തിയിരിക്കുകയാണ്, പ്രത്യേകിച്ചും ഉത്തരേന്ത്യയില്‍. തണുപ്പുകാലത്ത് ജീവിതശൈലിയില്‍ മാറ്റം വരുത്തുന്നത് പോലെ കാറുകളേയും വാഹനങ്ങളേയും തണുപ്പിനെ നേരിടാന്‍ സജ്ജമാക്കേണ്ടതുണ്ട്. ഒന്ന് ശ്രദ്ധിച്ചാല്‍ വാഹനത്തിന്റെ മൈലേജ് തണുപ്പ് കാലത്ത് കൂട്ടാവുന്നതാണ്.

തണുപ്പ് കാലത്ത് കാര്‍ ഓണാക്കി അല്‍പനേരം എഞ്ചിന്‍ ചൂടാക്കുന്ന ശീലമുണ്ടെങ്കില്‍ അത് ഒഴിവാക്കുന്നതാണ് നല്ലത്. കാരണം മോഡേണ്‍ കാറുകള്‍ ഡ്രൈവിംഗ് സമയത്ത് കൂടുതല്‍ കാര്യക്ഷമമായി ചൂടാകുന്നതിനാല്‍ ഇത്തരത്തില്‍ എഞ്ചിന്‍ ചൂടാക്കാന്‍ ശ്രമിക്കുന്നത് ഇന്ധന നഷ്ടത്തിന് മാത്രമേ കാരണമാവുകയുള്ളൂ.

കൂടാതെ തണുപ്പ് കാലത്ത് പരമാവധി വേഗത കുറച്ച് മാത്രമെ വാഹനം ഓടിക്കാന്‍ കഴിവതും ശ്രമിക്കാവൂ.പെട്ടെന്നുള്ള ബ്രേക്കിംഗും ദ്രുതഗതിയിലുള്ള സ്റ്റാര്‍ട്ടുകളും കൂടുതല്‍ ഇന്ധനം ചെലവഴിക്കുക മാത്രമല്ല വാഹനത്തില്‍ അധിക സമ്മര്‍ദ്ദം ചെലുത്തുകയും ചെയ്യുന്നു. സുഗമമായ ഡ്രൈവിംഗ് ശൈലി മികച്ച മൈലേജിന് കാര്യമായ സംഭാവന നല്‍കും.

ഇതിനൊപ്പം തന്നെ അമിതമായ ഭാരം വാഹനത്തില്‍ കയറ്റുന്നത് തണുപ്പുകാലത്ത് കഴിവതും ഒഴിവാക്കണം.അധിക ഭാരം കയറ്റുന്നതിലൂടെ കാറിന്റെ എഞ്ചിന് കൂടുതല്‍ ജോലിയെടുക്കേണ്ടി വരും. അങ്ങനെയാണ് ഇന്ധനക്ഷമത കുറയുന്നത്.ഇന്ധനക്ഷമത കൂട്ടുന്നതിന് തണുപ്പ് കാലത്ത് ശ്രദ്ധിക്കേണ്ട മറ്റൊരു കാര്യമാണ് ടയറിലെ പ്രഷര്‍ കുറയാതെ നോക്കുക എന്നത്. താപനില കുറയുമ്പോള്‍ ടയറിലെ മര്‍ദവും കുറയും അതിനാല്‍ ടയര്‍ പ്രഷര്‍ പരിശോധിച്ച് സെറ്റ് ചെയ്യുന്നതിലൂടെ വാഹനത്തിന്റെ ഇന്ധനക്ഷമത വര്‍ദ്ധിപ്പിക്കാം.

Content Highlights:Increase car mileage in winters using these tips