കോഴിക്കോട്: സമസ്ത 100ാം വാര്‍ഷിക ഉദ്ഘാടന സമ്മേളനം 2024 ജനുവരി 28ന് ബംഗളൂരുവില്‍ നടത്താന്‍ കോഴിക്കോട്ട് ചേര്‍ന്ന സമസ്ത കേരള ജംഇയ്യതുല്‍ ഉലമാ കേന്ദ്ര മുശാവറ യോഗം തീരുമാനിച്ചു. ആദര്‍ശ വിശുദ്ധിയോടെ ശതാബ്ദി പിന്നിടുന്ന സമസ്ത കേരള ജംഇയ്യതുല്‍ ഉലമായുടെ പ്രവര്‍ത്തനങ്ങള്‍ ദേശീയതലത്തില്‍ കൂടുതല്‍ വ്യാപിക്കുന്നതിന്റെ ഭാഗമായി നിരവധി പദ്ധതികളാണ് ആവിഷ്‌കരിച്ച് നടപ്പാക്കുന്നത്.

2016ല്‍ ആലപ്പുഴയില്‍ നടന്ന 90ാം വാര്‍ഷിക മഹാസമ്മേളനത്തിലാണ് സമസ്ത 100ാം വാര്‍ഷികം 2026ല്‍ ഫെബ്രുവരിയില്‍ നടത്തുമെന്ന് പ്രഖ്യാപിച്ചത്. രണ്ടുവര്‍ഷം നീണ്ടുനില്‍ക്കുന്ന പരിപാടികളുടെ ഉദ്ഘാടന സമ്മേളനമാണ് ജനുവരി 28ന് ബംഗളൂരുവില്‍ നടക്കുന്നത്. സ്വാഗതസംഘ രൂപീകരണം അടുത്തയാഴ്ച ബംഗളൂരുവില്‍ നടക്കും.

സമസ്ത കേരള ജംഇയ്യതുല്‍ ഉലമായുടെ ആശയാദര്‍ശങ്ങള്‍ അംഗീകരിച്ച് പ്രവര്‍ത്തിക്കുന്ന സ്ഥാപനങ്ങളുമായി ബന്ധപ്പെട്ട് നടത്തുന്ന പരിപാടികളില്‍ ഇസ്‌ലാമിന് നിരക്കാത്തതും പരിശുദ്ധ അഹ് ലുസ്സുന്നത്തി വല്‍ ജമാഅത്തിന്റെ ആശയാദര്‍ശങ്ങള്‍ക്ക് വിരുദ്ധവുമായ യാതൊന്നും ഉണ്ടാവാന്‍ പാടില്ലാത്തതാണെന്നും മേലില്‍ ആവര്‍ത്തിക്കാതിരിക്കാന്‍ ആവശ്യമായ നടപടികള്‍ സ്വീകരിക്കാന്‍ സ്ഥാപനങ്ങള്‍ക്കും ബന്ധപ്പെട്ടവര്‍ക്കും നിര്‍ദേശം നല്‍കാനും തീരുമാനിച്ചു. സമസ്തയുടെയും പോഷകസംഘടനകളുടെയും ഔദ്യോഗിക പദവിയിലിരിക്കുന്നവര്‍ ബിദഈ പ്രസ്ഥാനക്കാരുടെ പരിപാടികളില്‍ സംബന്ധിച്ചാല്‍ അവര്‍ക്കെതിരേ അച്ചടക്ക നടപടി സ്വീകരിക്കാനും യോഗത്തില്‍ തീരുമാനമായി.

പ്രസിഡന്റ് സയ്യിദ് മുഹമ്മദ് ജിഫ്‌രി മുത്തുക്കോയ തങ്ങള്‍ അധ്യക്ഷനായി. ജനറല്‍ സെക്രട്ടറി പ്രൊഫ. കെ. ആലിക്കുട്ടി മുസ്‌ലിയാര്‍ സ്വാഗതം പറഞ്ഞു. എം.ടി അബ്ദുല്ല മുസ്‌ലിയാര്‍, പി.പി ഉമര്‍ മുസ് ലിയാര്‍ കൊയ്യോട്, യു.എം അബ്ദുറഹിമാന്‍ മുസ്‌ലിയാര്‍, എം.കെ മൊയ്തീന്‍ കുട്ടി മുസ്‌ലിയാര്‍ കോട്ടുമല, എം.പി കുഞ്ഞിമുഹമ്മദ് മുസ്‌ലിയാര്‍ നെല്ലായ, കെ. ഉമര്‍ ഫൈസി മുക്കം, വി. മൂസക്കോയ മുസ്‌ലിയാര്‍, പി.കെ മൂസക്കുട്ടി ഹസ്‌റത്ത്, കെ. ഹൈദര്‍ ഫൈസി പനങ്ങാങ്ങര, ഡോ. ബഹാഉദ്ദീന്‍ മുഹമ്മദ് നദ്‌വി കൂരിയാട്, എം. മൊയ്തീന്‍ കുട്ടി ഫൈസി വാക്കോട്, എ.വി അബ്ദുറഹിമാന്‍ മുസ്‌ലിയാര്‍, കെ.കെ.പി അബ്ദുല്ല മുസ്‌ലിയാര്‍, പി.കെ ഹംസ കുട്ടി മുസ്‌ലിയാര്‍ ആദൃശേരി, ഐ.ബി ഉസ് മാന്‍ ഫൈസി, എം.എം അബ്ദുല്ല ഫൈസി എടപ്പാല, എം.പി മുസ്തഫല്‍ ഫൈസി, ബി.കെ അബ്ദുല്‍ ഖാദിര്‍ മുസ്‌ലിയാര്‍ ബംബ്രോണ, പി.എം അബ്ദുസ്സലാം ബാഖവി വടക്കേകാട്, എം.പി അബ്ദുല്‍ ഖാദിര്‍ മുസ്‌ലിയാര്‍ പൈങ്കണ്ണിയൂര്‍, എം.വി ഇസ്മായില്‍ മുസ്‌ലിയാര്‍, സി.കെ സൈദാലികുട്ടി ഫൈസി കോറാട്, അസ്ഗറലി ഫൈസി പട്ടിക്കാട്, സി.കെ അബ്ദുറഹിമാന്‍ ഫൈസി അരിപ്ര, കെ.എം ഉസ്മാന്‍ ഫൈസി തോടാര്‍, അബൂബക്കര്‍ ദാരിമി ഒളവണ്ണ, പി.വി അബ്ദുല്‍ സലാം ദാരിമി ആലമ്പാടി ചര്‍ച്ചയില്‍ പങ്കെടുത്തു.

സമസ്ത 100ാം വാര്‍ഷികം; ഉദ്ഘാടന സമ്മേളനം ജനുവരി 28ന് ബംഗളൂരുവില്‍