ന്യൂഡല്‍ഹി: ആഡംബര കപ്പലിലെ ലഹരിപ്പാര്‍ട്ടിയുമായി ബന്ധപ്പെട്ട് ഷാരൂഖ് ഖാന്റെ മകന്‍ ആര്യന്‍ ഖാന് ലഹരി എത്തിച്ച മലയാളി ശ്രേയസ് നായര്‍ അറസ്റ്റില്‍.
ഗുഡ്ഗാവില്‍ നിന്നാണ് ഇയാളെ നാര്‍കോട്ടിക് കണ്‍ട്രോള്‍ ബ്യൂറോ (എന്‍.സി.ബി) അറസ്റ്റ് ചെയ്തത്. നേരത്തെ ആര്യന്‍ ഖാന്‍ ഉള്‍പ്പെടെ എട്ടുപേരെ എന്‍.സി.ബി അറസ്റ്റ് ചെയ്തിരുന്നു. ആര്യന്‍, അര്‍ബാസ് മര്‍ച്ചന്റ്, മുണ്‍മുണ്‍ ധമേച്ച തുടങ്ങിയവരെ ഒക്ടോബര്‍ 7 വരെ മുംബൈ മജിസ്‌ട്രേറ്റ് കോടതി എന്‍.സി.ബി കസ്റ്റഡിയില്‍ വിട്ടിരുന്നു. ഇതിനിടെയാണ് ആര്യന്‍ഖാന് ലഹരിമരുന്നെത്തിച്ച ശ്രേയസ് നായര്‍ അറസ്റ്റിലായത്. ഉന്നത ബന്ധമുള്ള മയക്കുമരുന്ന് വിതരണക്കാരനാണ് ശ്രേയസ് എന്നാണ് വിവരം. ആഡംബര കപ്പലിലെ മയക്കുമരുന്ന് പാര്‍ട്ടിയില്‍ പങ്കെടുത്ത 25 പേര്‍ക്ക് ഇയാളാണ് മയക്കുമരുന്ന് എത്തിച്ചതെന്നാണ് എന്‍.സി.ബി പറയുന്നത്. കപ്പലില്‍ ലഹരിപ്പാര്‍ട്ടിയില്‍ പങ്കെടുക്കാമെന്ന് ഇയാള്‍ ആര്യന്‍ ഖാനെ അറിയിച്ചിരുന്നെങ്കിലും അവസാനനിമിഷം പിന്മാറിയെന്നും എം.ഡി.എം.എ അടക്കമുള്ള നിരോധിത മയക്കുമരുന്നുകള്‍ ഇയാളില്‍ നിന്ന് പിടിച്ചെടുത്തതായും റിപ്പോര്‍ട്ടുണ്ട്. ബിറ്റ്‌കോയിന്‍ വാങ്ങിയാണ് ഇയാള്‍ ഇടപാട് നടത്തുന്നത്. ആര്യന്റെയും അര്‍ബാസിന്റെയും വാട്‌സ്ആപ്പ് ചാറ്റാണ് പ്രധാന തെളിവായി എന്‍.സി.ബി ചൂണ്ടിക്കാട്ടുന്നത്. ഇതില്‍ പലതും കോഡ് ഭാഷയിലാണ്. ആര്യനും അര്‍ബാസിനും ശ്രേയസ് നായരെ നേരത്തെ പരിചയമുണ്ടെന്നാണ് എന്‍.സി.ബി പറയുന്നത്. ഇവര്‍ മൂന്നും പങ്കെടുത്ത ലഹരിപ്പാര്‍ട്ടിയുടെ ചിത്രങ്ങളും ലഭിച്ചു.