കാനത്തെ ഒരുനോക്ക് കാണാന്‍ തലസ്ഥാനം; സംസ്‌കാരം നാളെ

തിരുവനന്തപുരം: സി.പി.ഐ സംസ്ഥാന സെക്രട്ടറി കാനം രാജേന്ദ്രന് രാഷ്ട്രീയ കേരളത്തിന്റെ അന്ത്യാജ്ഞലി. കാനം രാജേന്ദ്രന്റെ മൃതദേഹം രാവിലെ ഏഴ് മണിയോടെ പ്രത്യേക വിമാനത്തില്‍ തിരുവനന്തപുരത്ത് എത്തിച്ചു. വിമാനത്താവളത്തില്‍ പ്രവര്‍ത്തകര്‍ കാനത്തിന് അന്ത്യാജ്ഞലി അര്‍പ്പിച്ചു. ഉച്ചയ്ക്ക് രണ്ടുമണി വരെ സി.പി.ഐയുടെ പട്ടം പി.എസ് സ്മാരകത്തില്‍ മൃതദേഹം പൊതുദര്‍ശനത്തിന് വയ്ക്കും.

അതുകഴിഞ്ഞ് വിലാപയാത്രയായി കോട്ടയത്തേക്ക് കൊണ്ടുപോകും. തുടര്‍ന്ന് സി.പി.ഐ കോട്ടയം ജില്ലാ കമ്മിറ്റി ഓഫിസില്‍ പൊതുദര്‍ശനത്തിന് വയ്ക്കും.അതിനു ശേഷം കാനത്തുള്ള സ്വന്തം വസതിയിലേക്ക് കൊണ്ടുപോകും. നാളെ രാവിലെ പത്ത് മണിക്കാണ് സംസ്‌കാരം.

കാനം രാജേന്ദ്രന്റെ സംസ്‌കാരം ഞായറാഴ്ച നടക്കുന്നതിനാല്‍ പെരുമ്പാവൂരിലെ നവകേരള സദസ് പരിപാടികളില്‍ മാറ്റം വരുത്തി. പ്രഭാതപരിപാടികള്‍ റദ്ദാക്കിയിട്ടുണ്ട്.

ഞായറാഴ്ച രണ്ട് മണിക്കാണ് മുഖ്യമന്ത്രിയും മന്ത്രിമാരും പെരുമ്പാവൂരില്‍ എത്തുക. പരാതികള്‍ ഞായറാഴ്ച 11 മണി മുതല്‍ 2 മണിവരെ കൗണ്ടറുകളില്‍ സ്വീകരിക്കും.