രാജ്‌കോട്ട്: വിജയ് ഹസാരെ ട്രോഫി ക്വാര്‍ട്ടറില്‍ രാജസ്ഥാനെതിരേ നാണംകെട്ട തോല്‍വിയുമായി കേരളം. 200 റണ്‍സിന് തോറ്റ കേരളം സെമി കാണാതെ പുറത്തായി. ടോസ് നഷ്ടപ്പെട്ട് ആദ്യം ബാറ്റിങ്ങിനിറങ്ങിയ രാജസ്ഥാന്‍ നിശ്ചിത 50 ഓവറില്‍ എട്ടു വിക്കറ്റ് നഷ്ടത്തില്‍ 267 റണ്‍സെടുത്തു. മറുപടി ബാറ്റിങ്ങിനിറങ്ങിയ കേരളം 21 ഓവറില്‍ ഒമ്പതിന് 67 റണ്‍സില്‍ ഒതുങ്ങി. പരിക്കേറ്റ വിഷ്ണു വിനോദ് റിട്ടയേര്‍ഡ് ഹര്‍ട്ടാകുകയായിരുന്നു.

ഏഴ് ഓവറില്‍ വെറും നാല് റണ്‍സിന് നാല് വിക്കറ്റ് വീഴ്ത്തിയ അനികേത് ചൗധരിയാണ് കേരളത്തെ തകര്‍ത്തത്. അറാഫത്ത് ഖാന്‍ മൂന്ന് വിക്കറ്റും ഖലീല്‍ അഹമ്മദ് രണ്ട് വിക്കറ്റും വീഴ്ത്തി. വെറും മൂന്ന് ബൗളര്‍മാരെ മാത്രം ഉപയോഗിച്ചാണ് രാജസ്ഥാന്‍, കേരളത്തെ എറിഞ്ഞിട്ടത്. ദക്ഷിണാഫ്രിക്കന്‍ പര്യടനത്തിനുള്ള ഇന്ത്യന്‍ ടീമിലേക്ക് തിരഞ്ഞെടുക്കപ്പെട്ടതിനാല്‍ ക്യാപ്റ്റന്‍ സഞ്ജു സാംസണ്‍ ഇല്ലാതെയാണ് കേരളം ഇന്നിറങ്ങിയത്. പകരം രോഹന്‍ കുന്നുമ്മലാണ് ടീമിനെ നയിച്ചത്.

കേരള നിരയില്‍ 28 റണ്‍സെടുത്ത സച്ചിന്‍ ബേബിയും 11 റണ്‍സെടുത്ത ക്യാപ്റ്റന്‍ രോഹന്‍ കുന്നുമ്മലും മാത്രമാണ് രണ്ടക്കം കടന്നത്. അവസാന വിക്കറ്റായാണ് സച്ചിന്‍ പുറത്തായത്. മഹാരാഷ്ട്രയ്‌ക്കെതിരായ പ്രീ ക്വാര്‍ട്ടറില്‍ സെഞ്ചുറിയുമായി തിളങ്ങിയ ഓപ്പണര്‍ കൃഷ്ണപ്രസാദ് ക്വാര്‍ട്ടറില്‍ വെറും ഏഴ് റണ്‍സിന് പുറത്തായി. മുഹമ്മദ് അസ്ഹറുദ്ദീന്‍ (3), ശ്രേയസ് ഗോപാല്‍ (0), അബ്ദുല്‍ ബാസിത് (1) എന്നിവരെല്ലാം തീര്‍ത്തും പരാജയമായി. വിഷ്ണു വിനോദ് നേരിട്ട ആദ്യ പന്തില്‍ തന്നെ പരിക്കേറ്റ് മടങ്ങുകയായിരുന്നു.

നേരത്തേ ടോസ് നഷ്ടപ്പെട്ട് ബാറ്റിങ്ങിനിറങ്ങിയ രാജസ്ഥാന്‍ മഹിപാല്‍ ലോംറോറിന്റെ സെഞ്ചുറി മികവിലാണ് 267 റണ്‍സെടുത്തത്.

വിജയ് ഹസാരെ ട്രോഫി; കേരളം സെമി കാണാതെ പുറത്ത്