തിരുവനന്തപുരം: കെ.എസ്.ആര്‍.ടി.സി.യില്‍ ശമ്പള പ്രതിസന്ധി രൂക്ഷമായി തുടരുന്നതിനിടെ ശമ്പള പരിഷ്‌ക്കരണം ആവശ്യപ്പെട്ട് നവംബര്‍ അഞ്ചിന് പണിമുടക്ക്് പ്രഖ്യാപിച്ച് സി.പി.എം അനുകൂല സംഘടന.

ഈ മാസം 28ന് സെക്രട്ടേറിയേറ്റ് മാര്‍ച്ച് നടത്തുമെന്നും സംഘടന പ്രഖ്യാപിച്ചു. ശമ്പളപരിഷ്‌ക്കരണം ആവശ്യപ്പെട്ട് സംഘടന എംഡിക്ക് നോട്ടിസ് നല്‍കിയെങ്കിലും തീരുമാനമാകാത്തതിനാലാണ് പണിമുടക്ക് പ്രഖ്യാപിച്ചത്. 2011 ലാണ് ഇതിന് മുന്‍പ് കെ.എസ്.ആര്‍.ടി.സിയില്‍ ശമ്പളം പരിഷ്‌ക്കരിച്ചത്.

75 കോടിയോളം രൂപയാണ് കെ.എസ്.ആര്‍.ടി.സിക്ക് പ്രതിമാസം ശമ്പളം നല്‍കാന്‍ വേണ്ടത്. ഓക്ടോബറില്‍ ശമ്പളം പൂര്‍ണായും നല്‍കാനായിട്ടില്ല. കൊവിഡ് പ്രതിസന്ധിയെതുടര്‍ന്ന് സര്‍വ്വീസുകളും യാത്രക്കാരും കുറഞ്ഞതോടെ വരുമാനം കുത്തനെ ഇടിഞ്ഞു.

നൂറ് കോടിയോളം മാത്രമാണ് ശരാശരി പ്രതിമാസ വരുമാനം. അതില്‍ 60 കോടിയോളം ഇന്ധനചെലവാണ്. മറ്റ് ചെലവുകളും കഴിഞ്ഞാല്‍ വരുമാനത്തില്‍ നിന്ന് ശമ്പളത്തിനുള്ള പകുതി തുകപോലും കണ്ടെത്താനാകാത്ത സ്ഥിതിയാണുള്ളത്.