നെടുമ്പാശ്ശേരി: രണ്ട് വയസില്‍ താഴെ പ്രായമുള്ള രണ്ട് കുട്ടികള്‍ കൂടി ഇന്ന് പുറപ്പെടുന്ന ഹജ്ജ് സംഘത്തോടൊപ്പം നെടുമ്പാശ്ശേരിയില്‍ നിന്നും മക്കയിലേക്ക് യാത്രയാകും.
കോഴിക്കോട് നിന്നുള്ള തീര്‍ഥാടകര്‍ക്കൊപ്പമാണ് രണ്ട് കുട്ടികളും ക്യാംപില്‍ എത്തിയത്.
കോഴിക്കോട് കരിപ്പൂര്‍ ചീരങ്ങാന്‍ വീട്ടില്‍ അഹമ്മദ് സഗീര്‍, സാഹിറ ദമ്പതികളുടെ മകന്‍ സലീക്ക് അഹമ്മദ്, കോഴിക്കോട് സ്വദേശികളായ അബ്ദുള്‍ അസീസ്, ഖദീജ ദമ്പതികളുടെ മകനായ മുഹമ്മദ് ഫത്തഹ് എന്നിവരാണ് ഇന്ന് യാത്രയാകുന്നത്.
എട്ട് മാസം പ്രായമാണ് ഇരുവര്‍ക്കും. അഹമ്മദ് സഗീറിന്റെ മാതാവ് സഫിയ, സഹോദരി ഭര്‍ത്താവ് അബ്ദുള്‍ നാസര്‍ എന്നിവര്‍ക്കൊപ്പമാണ് സലീക്ക് അഹമ്മദിന്റെ യാത്ര.
അബ്ദുള്‍ അസീസിന്റെ മാതാവ് ആയിഷ, ഭാര്യാ പിതാവ് മൂസ, ഭാര്യാ മാതാവ് നഫീസ എന്നിവര്‍ക്കൊപ്പമാണ് മുഹമ്മദ് ഫത്തഹിന്റെ മക്കയിലേക്കുള്ള യാത്ര. അഞ്ചാം വര്‍ഷ അപേക്ഷകരുടെ ആനുകൂല്യത്തിലാണ് ഇരു കൂട്ടര്‍ക്കും ഈ വര്‍ഷം ഹജ്ജിന് പുറപ്പെടാന്‍ അവസരം ഒരുങ്ങിയത്.