ബംഗളൂരു: രാജ്യത്ത് 21 ശതമാനം പേര്‍ക്ക് മാത്രമാണ് പൂര്‍ണമായി വാക്‌സിന്‍ ലഭിച്ചതെന്നും പിന്നെ എങ്ങനെയാണ് 100 കോടി ഡോസ് വിതരണം ചെയ്‌തെന്ന പേരില്‍ ആഘോഷം നടത്താനാവുകയെന്നും മുന്‍ കര്‍ണാടക മുഖ്യമന്ത്രി സിദ്ധരാമയ്യ. 100 കോടി ഡോസ് എന്നത് ഫാന്‍സി നമ്പര്‍ മാത്രമാണെന്നും 139 കോടി ജനങ്ങളില്‍ 29 കോടി പേര്‍ക്ക് മാത്രമാണ് രണ്ട് ഡോസ് വാക്‌സിനും നല്‍കാനായതെന്നും പിന്നെ എന്തിന്റെ പേരിലാണ് ബി.ജെ.പി ആഘോഷിക്കുന്നതെന്നും മുതിര്‍ന്ന കോണ്‍ഗ്രസ് നേതാവായ അദ്ദേഹം ട്വീറ്റ് ചെയ്തു. 42 കോടി പേര്‍ക്ക് മാത്രമാണ് സിംഗിള്‍ ഡോസ് ലഭിച്ചത്. ഇന്ത്യയിലെ ജനങ്ങള്‍ ഇപ്പോഴും അപകടാവസ്ഥ തരണം ചെയ്തിട്ടില്ല. 

ആസന്നമായ സംസ്ഥാന തെരഞ്ഞെടുപ്പുകളുടെ പശ്ചാത്തലത്തില്‍ 100 കോടി ഡോസ് വാക്‌സിന്‍ നല്‍കിയത് ബി.ജെ.പി രാഷ്ട്രീയ നേട്ടമായി ഉയര്‍ത്തിക്കാണിക്കാന്‍ വിവിധ പരിപാടികള്‍ സംഘടിപ്പിക്കുന്നുണ്ട്. ഈ സാഹചര്യത്തിലാണ് കോണ്‍ഗ്രസ് വിമര്‍ശനവുമായി രംഗത്തുവന്നത്.