റിയാദ്: വിശിഷ്ട പ്രതിഭകൾക്കും വിവിധ മേഖലകളിൽ കഴിവ് തെളിയിച്ച വിദഗ്ധർക്കും പ്രതിഭകൾക്കുമെല്ലാം പൗരത്വം നൽകാൻ സഊദി അറേബ്യ. ഇവർക്ക് സഊദി പൗരത്വം നൽകുന്നതിന് ഭരണാധികാരി സൽമാൻ രാജാവ് അംഗീകാരം നൽകി.

വികസനം പ്രോത്സാഹിപ്പിക്കുന്നതിനും വിവിധ മേഖലകളിൽ രാജ്യത്തിന് നേട്ടമുണ്ടാക്കുന്നതിനും സംഭാവന ചെയ്യുന്ന വിധത്തിൽ നിയമ, മെഡിക്കൽ, ശാസ്ത്ര, സാംസ്കാരിക, കായിക, സാങ്കേതിക മേഖലകളിൽ കഴിവുകളുള്ളവർക്ക് വാതിൽ തുറക്കുന്നതിനാണ് പുതിയ തീരുമാനം.

സഊദി വിഷൻ 2030 ന്റെ ഭാഗമായാണ് പുതിയ തീരുമാനം. കഴിവുകൾ നിക്ഷേപിക്കാവുന്ന ആകർഷകമായ അന്തരീക്ഷം വർദ്ധിപ്പിക്കാനും വിശിഷ്ടരും സർഗ്ഗാത്മകരുമായ ആളുകളെ ആകർഷിക്കാനും ഇത്‌ ലക്ഷ്യമിടുന്നുണ്ട്.