അരീക്കോട്: സ്വത്ത് തര്‍ക്കത്തെത്തുടര്‍ന്നുസഹോദരന്റെ കുത്തേറ്റു തച്ചണ്ണ പാക്കുളത്തു മുത്തേടത്ത് പാറക്കല്‍ വീട്ടില്‍ അബ്ദുറസാഖ് (53) കൊല്ലപ്പെട്ട സംഭവത്തില്‍ പ്രതി അബ്ദുല്‍ ജലീലിനെ സംഭവ സ്ഥലത്തെത്തിച്ചു തെളിവെടുപ്പു നടത്തി. ഇന്നലെ ഉച്ചയ്ക്കു രണ്ടരയോടെയാണു മഞ്ചേരി സി.ഐയുടെ നേതൃത്വത്തില്‍ പ്രതിയെ തെളിവെടുപ്പിനായി കൊണ്ടുവന്നത്.
കൊലചെയ്യാന്‍ ഉപയോഗിച്ച ആയുധം വലിച്ചെറിഞ്ഞ ചാലി കമുകിന്‍ തോട്ടത്തിലേക്കാണു പ്രതിയെ ആദ്യം കൊണ്ടുവന്നത്. ഇവിടെ നിന്നു കൊലയ്ക്കുപയോഗിച്ച കത്തി പൊലിസ് കണ്ടെടുത്തു. പിന്നീട് കേസിലെ നടന്ന തച്ചാംപറമ്പ് അങ്ങാടിയിലും പ്രതിയുടെ വീട്ടിലുമെത്തിച്ചു തെളിവെടുപ്പു നടത്തി. പൊലിസ്  വാഹനത്തില്‍ നിന്നിറക്കിയപ്പോള്‍ പ്രതി കരഞ്ഞു. പിന്നീട് അനുസരണയോടെ കൊല ചെയ്യാന്‍ വന്ന വഴിയും മറ്റും പൊലിസിനു കാണിച്ചു കൊടുത്തു. പ്രതിയെ തെളിവെടുപ്പിനായി കൊണ്ടു വരുമെന്നറിഞ്ഞതോടെ വിവിധ പ്രദേശങ്ങളില്‍ നിന്നായി നൂറു കണക്കിനാളുകള്‍ നേരത്തെ തന്നെ തച്ചാംപറമ്പിലും പ്രതിയുടെ വീടിനു പരിസരത്തും എത്തിയിരുന്നു.
പ്രതി കുറ്റം സമ്മതിച്ചതായി മഞ്ചേരി സിഐ കെ.എം ബിജു പറഞ്ഞു. കഴിഞ്ഞ വെള്ളിയാഴ്ച 12.30നാണു പള്ളിയിലേക്കു ബൈക്കില്‍ പുറപ്പെട്ട അബ്ദുറസാഖിനെ മറ്റൊരു ബൈക്കിലെത്തിയ അബ്ദുല്‍ ജലീല്‍ ബൈക്ക് ഇടിച്ച് തള്ളിയിട്ട ശേഷം കത്തി ഉപയോഗിച്ചു കുത്തികൊലപ്പെടുത്തിയത്. വര്‍ഷങ്ങളായി നിലനില്‍ക്കുന്ന സ്വത്ത് തര്‍ക്കമാണു കൊലപാതകത്തിനു കാരണമെന്നും പ്രതിക്കു പുറമെ നിന്നുള്ള സഹായങ്ങളൊന്നും ലഭിച്ചിട്ടില്ലെന്നും മഞ്ചേരി സി ഐ കെ.എം ബിജു പറഞ്ഞു. പ്രതിയെ ഇന്നു മഞ്ചേരി ഫാസ്റ്റ് ക്ലാസ് കോടതിയില്‍ ഹാജരാക്കും.