പി.കെ മുഹമ്മദ് ഹാത്തിഫ്
കോഴിക്കോട്

ന്യൂനപക്ഷ ക്ഷേമ വകുപ്പ് നടപ്പു സാമ്പത്തിക വർഷം ബജറ്റിൽ വകയിരുത്തിയ തുകയിൽ പകുതി പോലും ചെലവാക്കിയിട്ടില്ലെന്ന് കണക്കുകൾ. നടപ്പു സാമ്പത്തിക വർഷത്തിൽ (2021-22) ഡിസംബർ ഒൻപതു വരെയുള്ള കണക്കുകൾ പ്രകാരം വകയിരുത്തിയ തുകയുടെ ആകെ 39.74 ശതമാനം മാത്രമാണ് ചെലവഴിച്ചതെന്നാണ് സർക്കാർ വെബ്‌സൈറ്റായ പ്ലാൻസ്‌പേസിൽ പറയുന്നത്.

വിവിധ സ്‌കോളർഷിപ്പുകൾ, ഭവന നിർമാണം, ന്യൂനപക്ഷ വികസനത്തിനായുള്ള മറ്റു ഫണ്ടുകളും പൂർണമായും ചെലവഴിച്ചിട്ടില്ലെന്നാണ് സർക്കാരിന്റെ കണക്കുകളിൽ പറയുന്നത്. കഴിഞ്ഞ ബജറ്റിൽ ന്യൂനപക്ഷ വിഭാഗങ്ങൾക്കായുള്ള 12 പദ്ധതികൾക്കായി ആകെ വകയികരുത്തിയത് 29.66 കോടി രൂപയാണ്. എന്നാൽ 11.78 കോടി മാത്രമാണ് ചെലവാക്കിയത്. സി.എ, ഐ.സി.ഡബ്ല്യു.എ വിദ്യാർഥികൾക്കായുള്ള സ്‌കോളർഷിപ്പ് തുകയ്ക്കായി വകയിരുത്തിയ 45 ലക്ഷം രൂപയിൽ ഒറ്റ തുക പോലും അപേക്ഷകരുണ്ടായിട്ടും അനുവദിച്ചിട്ടില്ലെന്നും കണക്കുകളിൽ പറയുന്നു. ഇതിനു പുറമെ കഴിവു തെളിയിക്കുന്ന വിദ്യാർഥികൾക്ക് നൽകുന്ന സ്‌കോളർഷിപ്പിന് വകയിരുത്തിയ നാലു കോടിയിലധികം രൂപയും അപേക്ഷകരുണ്ടായിട്ടു പോലും ചെലവഴിക്കാതെ കിടക്കുകയാണ്. ന്യൂനപക്ഷ വിഭാഗത്തിലെ നഴ്‌സിങ് വിദ്യാർഥികളുടെ സ്‌കോളർഷിപ്പിനായി 50 ലക്ഷം രൂപ, മൂന്നു വർഷത്തെ ഡിപ്ലോമ കോഴ്‌സുകൾ പഠിക്കുന്ന വിദ്യാർഥികൾക്കുള്ള സ്‌കോളർഷിപ്പിന് വകയിരുത്തിയ 60 ലക്ഷം, പ്രീമാരിറ്റൽ കൗൺസിലിനായുള്ള 90 ലക്ഷം തുടങ്ങിയ വിവിധ പദ്ധതികൾക്കായി വകയിരുത്തിയ ഫണ്ടും ഇതുവരെയും ചെലവഴിക്കാതെ കിടക്കുകയാണ്.
കരിയർ ഗൈഡൻസ് പരിപാടികൾക്കായി വകയിരുത്തിയ 1 കോടി 20 ലക്ഷം രൂപയും ചെലവഴിക്കാതെ കിടക്കുന്നവയിൽ ഉൾപ്പെടും. ബി.പി.എൽ വിദ്യാർഥികൾക്കായുള്ള നൈപുണ്യ പരിശീലനത്തിന്റെ രണ്ടു കോടിയിലധികം രൂപയും ചെലവഴിച്ചിട്ടില്ല. ഭവന നിർമാണത്തിനായി അഞ്ചു കോടി രൂപയാണ് വകയിരുത്തിയിരുന്നത്. എന്നാൽ ഇതിൽ ആകെ 21 ലക്ഷം മാത്രമാണ് ചെലവാക്കിയത്.

അതേസമയം കൊവിഡ് കാരണം പല പദ്ധതികളും പാതിവഴിയിൽ മുടങ്ങിയതാണ് ഫണ്ട് പൂർണമായും ചെലവഴിക്കാൻ സാധിക്കാതെ പോയതെന്നാണ് വകുപ്പ് അധികൃതർ നൽകുന്ന വിശദീകരണം.
കോളജുകൾ, സ്‌കൂളുകൾ എന്നിവ അടച്ചിട്ടതിനാൽ വിദ്യാർഥികളുടെ ഹോസ്റ്റൽ ഫീസടക്കമുള്ള സ്‌കോളർഷിപ്പുകളുടെ ഫണ്ടും പൂർണമായി ചെലവഴിക്കാൻ സാധിച്ചിട്ടില്ല. പ്രീമാരിറ്റൽ, കരിയർ ഗൈഡൻസ് ക്ലാസുകളും കൊവിഡ് കാരണം ഓൺലൈനായാണ് സംഘടിപ്പിച്ചതെന്നും ഭവന നിർമാണ പദ്ധതികളിൽ പലതും ഇപ്പോഴും തുടരുന്നതിനാലാണ് ഈ ഫണ്ടുകൾ പൂർണമായും ചെലവഴിക്കാൻ സാധിക്കാതെ പോയതെന്നുമാണ് അധികൃതർ നൽകുന്ന വിശദീകരണം.
എന്നാൽ നടപ്പു സാമ്പത്തിക വർഷം അവസാനിക്കാൻ മാസങ്ങൾ മാത്രം ബാക്കി നിൽക്കേ തുക പകുതി പോലും ചെലവഴിക്കാതെ പോയതിനെതിരെ ആക്ഷേപമുയർന്നിട്ടുണ്ട്. മുൻ വർഷങ്ങളിലും വകുപ്പ് വിവിധ കാരണങ്ങൾ നിരത്തി ബജറ്റിൽ വകയിരുത്തിയ കോടികൾ ചെലവഴിച്ചിരുന്നില്ലെന്നും ആരോപണമുയർന്നിട്ടുണ്ട്.