കോഴിക്കോട്: വെള്ളയില്‍ കാര്‍ സര്‍വിസ് സെന്ററില്‍ തീപിടിത്തം. പണിക്കര്‍ റോഡിലെ ഇന്‍ഡസ് മോട്ടോര്‍സ് സര്‍വിസ് സെന്ററിലെ പെയിന്റ് ബൂത്തിന് രാവിലെ പത്തരയോടെയാണ് തീപിടിച്ചത്. ആര്‍ക്കും പരുക്കില്ല. തൊട്ടടുത്ത കയര്‍ ഫെഡ് റീജിയണല്‍ ഓഫിസിലേക്ക് തീപടരാതിരുന്നതിനാല്‍ വന്‍ അപകടം ഒഴിവായി.

തീ പടരുന്നത് ശ്രദ്ധയില്‍പ്പെട്ട ഉടനെ സര്‍വിസ് സെന്ററിലെ ഇരുപതോളം കാറുകള്‍ പുറത്തേക്ക് മാറ്റിയതിനാല്‍ കൂടതല്‍ നാശനഷ്ടം ഒഴിവായി. ബീച്ച് മീഞ്ചന്ത വെള്ളിമാട് കുന്ന് സ്‌റ്റേഷനുകളില്‍ നിന്നായി അഞ്ച് യൂണിറ്റ് അഗ്നിരക്ഷാസേന എത്തിയാണ് തീ അണച്ചത്. തീ പിടിത്തം അറിയിച്ചിട്ടും അഗ്നിരക്ഷാസേന എത്താന്‍ വൈകിയെന്ന് പ്രദേശവാസികള്‍ ആരോപിച്ചു.