പൂച്ചാക്കല്‍: ഇത്തവണയും ഓണത്തിനുമുമ്പ് ഒ. ഇ.സി.വിഭാഗം വിദ്യാര്‍ത്ഥികള്‍ക്ക് ധനസഹായം ലഭിക്കില്ല. സാങ്കേതിക പ്രശ്‌നമാണ് തടസ്സമായി അധികൃതര്‍ പറയുന്നത്. കഴിഞ്ഞ വര്‍ഷവും സാങ്കേതിക പ്രശനം പറഞ്ഞ് വൈകിപ്പിച്ചതാണ്. കഴിഞ്ഞ വര്‍ഷമാണ് ഒ.ഇ.സി.കാരുടെ അപേക്ഷകള്‍ ഓണ്‍ലൈനാക്കിയത്.
വിദ്യാര്‍ഥികളുടെ അക്കൗണ്ടിലേക്ക് പണം അയക്കാനായിരുന്നു ഈ നടപടി. എന്നാല്‍ പ്രഥമാധ്യാപകരുടെ അക്കൗണ്ടില്‍ നിന്നായിരുന്നു കഴിഞ്ഞ വര്‍ഷവും പണം വിതരണം ചെയ്തത്.
ഇത്തവണയും മുഴുവന്‍ വിദ്യാര്‍ഥികളുടെയും അക്കൗണ്ടിലേക്ക് പണം അയക്കല്‍ അസാധ്യമാകുമെന്ന് ചൂണ്ടിക്കാണിക്കപ്പെടുന്നുണ്ട്. മുഴുവന്‍ വിദ്യാര്‍ഥികള്‍ക്കും ആധാര്‍ ഇല്ലാത്തതാണ് കാരണമായി പറയുന്നത്. കഴിഞ്ഞ വര്‍ഷത്തേതില്‍ നിന്നു  ധനസഹായ സംഖ്യ വര്‍ധിപ്പിച്ചിട്ടുണ്ട്.എല്‍.പി.വിഭാഗം ഒ.ഇ.സി. വിദ്യാര്‍ഥികള്‍ക്ക് 250ല്‍ നിന്നും 313ലേക്കും യു.പി. 500ല്‍ നിന്നും 625 ലേക്കും ഹൈസ്‌കൂള്‍ 750ല്‍ നിന്നും 925 ലേക്കുമാണ് വര്‍ധിപ്പിച്ചത്. എന്നാല്‍ ഓണത്തിന് മുമ്പ് ഇത് ലഭിക്കാനിടയില്ല.
മുമ്പ് പട്ടികജാതി വകുപ്പാണ് ഒ.ഇ.സി .വിഭാഗം വിദ്യാര്‍ഥികളുടെ ധനസഹായ വിതരണ കാര്യങ്ങള്‍ ചെയ്തിരുന്നത്. കഴിഞ്ഞ വര്‍ഷം ഒ ബി സി യില്‍ നിന്നും 30ഓളം വിഭാഗങ്ങളെ ഒ.ഇ.സി.യിലേക്ക് മാറ്റിയിരുന്നു. ഇത് ധനസഹായ ഫണ്ടിന്റെ അപര്യാപ്തക്ക് ഇടയാക്കി. ഒ.ഇ.സി.ക്കാര്‍ക്ക് ഫണ്ട് നല്‍കാനുള്ള അനുമതി പട്ടികജാതി വകുപ്പില്‍ നിന്നാണ് ഉണ്ടാകേണ്ടത്. എന്നാല്‍ ഫണ്ട് അനവദിച്ച് നല്‍കേണ്ടത് ഒ.ബി.സി. വകുപ്പില്‍ നിന്നുമാണ്.
മുന്‍ വര്‍ഷങ്ങളില്‍ അതത് സ്‌കൂളുകളിലെ ഒ.ഇ.സി വിദ്യാര്‍ഥികളുടെ ലിസ്റ്റ് പ്രധാനാധ്യാപകര്‍ തയാറാക്കി പട്ടികജാതി വകുപ്പിന് കൈമാറും. ഇപ്രകാരം പ്രധാനാധ്യാപകരുടെ അക്കൗണ്ടില്‍ എത്തുന്ന പണമാണ് ഈ വിഭാഗത്തിലെ വിദ്യാര്‍ഥികള്‍ക്ക് മുമ്പ് നല്‍കിയിരുന്നത്.കഴിഞ്ഞവര്‍ഷം മുതലാണ് ഓരോ രക്ഷിതാവും ഓണ്‍ലൈനായി അപേക്ഷ സമര്‍പ്പിക്കണമെന്ന നിര്‍ദേശം വന്നത്.  
ഇതിനിടയില്‍ പട്ടികജാതിക്കാരായ വിദ്യാര്‍ഥികളുടെ ധനസഹായം മുന്‍ വര്‍ഷങ്ങളിലേതു പോലെ അനുവദിക്കുകയും ആഴ്ചകള്‍ക്ക് മുമ്പേ ഇതിന്റെ വിതരണം പൂര്‍ത്തിയാകുകയും ചെയ്തിരുന്നു.