ഹൈദരാബാദ്: ഹൈദരാബാദ് കേന്ദ്ര സര്‍വ്വകലാശാലയിലെ ഗവേഷക വിദ്യാര്‍ഥിയായിരുന്ന രോഹിത് വെമുലയുടെ മരണവുമായി ബന്ധപ്പെട്ട കേസ് അവസാനിപ്പിച്ചതായി തെലങ്കാന പൊലിസ്. ഇന്ന് ഹൈക്കോടതിയില്‍ അന്വേഷണറിപ്പോര്‍ട്ട് നല്‍കും. കേസുമായി ബന്ധപ്പെട്ട കുറ്റാരോപിതരായവരെയെല്ലാം ഒഴിവാക്കുന്ന രീതിയിലാണ് പൊലിസിന്റെ റിപ്പോര്‍ട്ട്. 

രോഹിത് ദലിത് വിദ്യാര്‍ത്ഥിയായിരുന്നില്ലെന്ന വാദമാണ് പൊലിസ് അന്തിമറിപ്പോര്‍ട്ടിലും ആവര്‍ത്തിച്ചിരിക്കുന്നത്. വ്യാജസര്‍ട്ടിഫിക്കറ്റ് ഉണ്ടാക്കിയാണ് രോഹിത് സര്‍വ്വകലാശാലയില്‍ പ്രവേശനം നേടിയത്. ഇത് പുറത്തുവരുമോ എന്ന ഭയം മൂലമാകാം ആത്മഹത്യ എന്നും പൊലിസ് റിപ്പോര്‍ട്ടില്‍ പറയുന്നു.

സെക്കന്തരാബാദ് എം.പി ബന്ദരു ദത്താചാര്യ, എം.എല്‍,സി എന്‍ രാമചന്ദര്‍ റാവു, വൈസ് ചാന്‍സലര്‍ അപ്പ റാവു ബി.ജെ.പി നേതാക്കള്‍ വനിതാ ശിശു ക്ഷേ മന്ത്രി സ്മൃതി ഇറാനി തുടങ്ങിയവരെയെല്ലാം കേസില്‍ നിന്ന് ഒഴിവാക്കുന്നതാണ് പൊലിസിന്റെ അന്തിമ റിപ്പോര്‍ട്ട്. കോണ്‍ഗ്രസ് സര്‍ക്കാര്‍ അധികാരമേറ്റ് മാസങ്ങള്‍ക്കകമാണ് ഇപ്പോള്‍ റിപ്പോര്‍ട്ട് സമര്‍പ്പിച്ചിരിക്കുന്നത്. 

അതേസമയം, പൊലിസ് റിപ്പോര്‍ട്ടില്‍ കോണ്‍ഗ്രസോ മറ്റു പാര്‍ട്ടികളോ പ്രതികരിച്ചിട്ടില്ല. കോടതിയുടെ ഉത്തരവ് വരുന്നതു വരെ പ്രതികരിക്കാനില്ലെന്നാണ് രോഹിതിന്റെ മാതാവ് ഉള്‍പെടെ ബന്ധുക്കളുടേയും എ.എസ്.എയുടേയും നിലപാട്. 

സര്‍വകലാശാലയില്‍ നേരിട്ടിരുന്ന ദളിത് വിവേചനത്തില്‍ പ്രതിഷേധിച്ചായിരുന്നു രോഹിതിന്റെ ആത്മഹത്യ. 2016 ജനുവരി 17നാണ് ഹോസ്റ്റല്‍ മുറിയില്‍ രോഹിത് ജീവനൊടുക്കിയത്. താന്‍ അടക്കമുള്ള അഞ്ച് വിദ്യാര്‍ഥികളുടെ സസ്‌പെന്‍ഷനെതിരായ രാപ്പകല്‍ സമരത്തിനൊടുവിലായിരുന്നു രോഹിത് ആത്മഹത്യ ചെയ്തത്. രോഹിത് എഴുതിയ അഞ്ച് പേജുള്ള ആത്മഹത്യക്കുറിപ്പ് കണ്ടെടുത്തിരുന്നു. രോഹിതിന്റെ ആത്മഹത്യയെ തുടര്‍ന്ന് സര്‍വകലാശാലയിലും രാജ്യമെമ്പാടും പ്രതിഷേധം ആളിക്കത്തിയിരുന്നു.