കൊല്‍ക്കത്ത: തെരഞ്ഞെടുപ്പ് പ്രചാരണത്തിന് വീണ്ടും വിദ്വേഷം ആയുധമാക്കി പ്രധാനമന്ത്രി നരേന്ദ്ര മോദി. പശ്ചിമ ബംഗാളിലെ തെരഞ്ഞെടുപ്പ് പ്രചാരണത്തിനിടെയാണ് മോദി വീണ്ടും വിദ്വേഷം പറഞ്ഞത്. 

ബംഗാളിലെ ബര്‍ദ്വാനിലെ തെരഞ്ഞെടുപ്പ് റാലിയില്‍ പശ്ചിമബംഗാളില്‍ തൃണമൂല്‍ കോണ്‍ഗ്രസ് സര്‍ക്കാര്‍ ഹിന്ദുക്കളെ രണ്ടാംതരം പൗരന്‍മാരാക്കിയെന്ന് പ്രധാനമന്ത്രി പറഞ്ഞു. 

'ഇന്നലെ ബംഗാളില്‍ ഒരു തൃണമൂല്‍ എംഎല്‍എ പരസ്യമായി ഭീഷണിപ്പെടുത്തിയത് ഞാന്‍ ടിവിയില്‍ കണ്ടു. രണ്ട് മണിക്കൂറിനുള്ളില്‍ ഹിന്ദുക്കളെ ഭാഗീരഥിയില്‍ മുക്കിക്കൊല്ലുമെന്നാണ് അദ്ദേഹത്തിന്റെ പ്രസംഗം. ഇത് ഏതുതരം ഭാഷയാണ്? ബംഗാളിലെ ഹിന്ദുക്കള്‍ക്ക് എന്താണ് സംഭവിക്കുന്നത്? ബംഗാളില്‍ ഹിന്ദുക്കളെ രണ്ടാംതരം പൗരന്മാരായാണ് പരിഗണിക്കുന്നത്' മോദി പറഞ്ഞു. 

സന്ദേശ്ഖലി കേസില്‍ ് ഷെയ്ഖ് ഷാജഹാനെ സംരക്ഷിക്കാന്‍ ശ്രമിക്കുകയാണ് തൃണമൂലെന്നും മോദി കുറ്റപ്പെടുത്തി.  

'സന്ദേശ്ഖലിയിലെ സ്ത്രീകള്‍ക്ക് എന്ത് സംഭവിച്ചുവെന്ന് രാജ്യത്തിന് മുഴുവന്‍ അറിയാം. അതിനുശേഷം മുഖ്യപ്രതിയെ സംരക്ഷിക്കാന്‍ തൃണമൂല്‍ കോണ്‍ഗ്രസ് ആഗ്രഹിച്ചു, കാരണം അയാളുടെ പേര് ഷെയ്ഖ് ഷാജഹാന്‍ എന്നായിരുന്നു' പ്രധാനമന്ത്രി പറഞ്ഞു.

ജയ് ശ്രീറാം എന്ന മുദ്രാവാക്യത്തോട് പോലും എതിര്‍പ്പ് പ്രകടിപ്പിക്കുന്ന ഇവരൊക്കെ എങ്ങനെയുള്ളവരാണ്? രാമക്ഷേത്രം പണിയുന്നതിലും രാമനവമി ഘോഷയാത്രയിലും അവര്‍ക്ക് എതിര്‍പ്പുണ്ടെന്നും പ്രീണനനയം മാത്രമാണ് മമതസര്‍ക്കാര്‍ തുടരുന്നതെന്നും മോദി പറഞ്ഞു.

സ്വന്തം സുഖത്തിന് വേണ്ടിയല്ല താന്‍ പ്രധാനമന്ത്രിയായതെന്ന് മോദി പറഞ്ഞു. ജനങ്ങളുടെ സ്വപ്നങ്ങള്‍ സാക്ഷാത്കരിക്കുക എന്നത് മാത്രമാണ് തന്റെ സ്വപ്‌നം. രാജ്യത്തെ ജനങ്ങള്‍ മാത്രമാണ് തന്റെ അവകാശികളെന്നും പ്രധാനമന്ത്രി പറഞ്ഞു.