തൃശൂര്‍: ഗൃഹനാഥനെ കരുതല്‍ തടവിലാക്കി പൊലിസ് സന്നാഹത്തോടെ വീട് ജപ്തി ചെയ്തു. തൃശൂര്‍ പുത്തന്‍പീടിക സ്വദേശി ചക്കിത്തറ വീട്ടില്‍ സുരേഷിന്റെ വീട് ആണ് ബാങ്ക് അധികൃതര്‍ ജപ്തി ചെയ്തത്. ആത്മഹത്യ ഭീഷണി മുഴക്കിയ സുരേഷിന്റെ ഭാര്യയെയും മക്കളേയും വാതില്‍ ചവിട്ടിപ്പൊളിച്ച് പുറത്തിറക്കിയ ശേഷമായിരുന്നു ജപ്തി നടപടികള്‍. 

വീട് ജപ്തി ചെയ്യാനെത്തിയാല്‍ കുടുംബം ആത്മഹത്യക്ക് ശ്രമിച്ചേക്കുമെന്ന സ്‌പെഷ്യല്‍ ബ്രാഞ്ച് റിപ്പോര്‍ട്ടിന്റെ അടിസ്ഥാനത്തില്‍ ഗൃഹനാഥനെ പൊലിസ് രാവിലെ തന്നെ കരുതല്‍ തടങ്കലിലാക്കിയിരുന്നു. തുടര്‍ന്ന് ഇരുപതോളം പൊലിസുകാരുടെ നേതൃത്വത്തിലാണ് ബാങ്കുകാര്‍ വീട്ടിലെത്തിയത്. എന്നാല്‍ സുരേഷിന്റെ ഭാര്യയും മക്കളും വീട് പൂട്ടി ആത്മഹത്യ ഭീഷണി മുഴക്കിയതോടെ കാര്യങ്ങള്‍ കുഴപ്പത്തിലായി. തുടര്‍ന്ന് പൊലിസ് വാതില്‍ തകര്‍ത്ത് അകത്തുകയറുകയായിരുന്നു. 

പിന്നീട് വീടിനകത്തുണ്ടായിരുന്നവരെ പുറത്തിറക്കിയാണ് ജപ്തി നടപടികള്‍ പൂര്‍ത്തിയാക്കിയത്. ദേശസാല്‍കൃത ബാങ്കില്‍ ഒരു കോടിയിലധികം രൂപയുടെ വായ്പയാണ് സുരേഷിന്റെ പേരിലുള്ളത്. തിരിച്ചടവ് മുടങ്ങിയതോടെ സ്ഥലം ഒരു സുഹൃത്തിന് കൈമാറി. ഇയാളും തിരിച്ചടവ് മുടക്കിയതോടെയാണ് ബാങ്ക് ജപ്തി നടപടിയിലേക്ക് കടന്നത്. പൊലിസ് നടപടിയില്‍ പരാതി നല്‍കാനുള്ള നീക്കത്തിലാണ് കുടുംബം.