ന്യൂഡല്‍ഹി: എഡിറ്റര്‍ പ്രബീര്‍ പുരകായസ്തയയെ വിട്ടയച്ച നടപടി സ്വാഗതം ചെയ്ത് ന്യൂസ് ക്ലിക്ക്. 'സ്വതന്ത്ര മാധ്യമപ്രവര്‍ത്തനത്തിന്റെ നല്ല ദിനം' എന്ന് ന്യൂസ് ക്ലിക്ക് ഔദ്യോഗിക എക്‌സ് പ്ലാറ്റ്‌ഫോമില്‍ പോസ്റ്റ് ചെയ്തു. അറസ്റ്റും റിമാന്‍ഡും നിയമവിരുദ്ധമെന്ന് കോടതി ചൂണ്ടിക്കാട്ടിയാണ് ഇന്ന്  പ്രബീര്‍ പുരകായസ്തയെ വിട്ടയക്കാന്‍ സുപ്രിം കോടതി ഉത്തരവിട്ടത്.ഡല്‍ഹി പൊലിസ് യു.എ.പി.എ ചുമത്തിയ കേസിലാണ് കോടതി നടപടി. 

വാര്‍ത്താപോര്‍ട്ടലായ ന്യൂസ് ക്ലിക്കിന്റെ സ്ഥാപകനും എഡിറ്ററുമായ പ്രബീര്‍ പുര്‍കയാസ്തയെ ഇന്ത്യാ വിരുദ്ധ പ്രചരണത്തിന് ചൈനീസ് ഫണ്ട് സ്വീകരിച്ചു എന്ന് ആരോപിച്ചാണ് ഡല്‍ഹി പൊലിസ് അറസ്റ്റ് ചെയ്യുന്നത്. 2023 ഒക്ടോബറിലായിരുന്നു അറസ്റ്റ്. കേസില്‍ ഉടന്‍ തന്നെ യു.എ.പി.എ ചുമത്തി. ന്യൂസ് ക്ലിക്ക് എച്ച്.ആര്‍ തലവനായ അമിത് ചക്രവര്‍ത്തിയേയും പൊലിസ് അറസ്റ്റ് ചെയ്തിരുന്നു. ചൈന അനുകൂല പ്രചാരണം നടത്താന്‍ ന്യൂസ് പോര്‍ട്ടലിന് പണം കൈപ്പറ്റിയെന്നാരോപിച്ച് തീവ്രവാദ വിരുദ്ധ നിയമം, നിയമവിരുദ്ധ പ്രവര്‍ത്തനങ്ങള്‍ തടയല്‍ നിയമം (യുഎപിഎ) പ്രകാരമാണ് ന്യൂസ് ക്ലിക്കിനെതിരെ കേസെടുത്തിരിക്കുന്നത്.

സ്ഥാപനത്തിനെതിരെയും യുഎപിഎ ചുമത്തിയപൊലിസ് ഓഫിസ് പൂട്ടി സീല്‍ ചെയ്തിരുന്നു. പ്രബീര്‍ പുരകായസ്തയ്‌ക്കെതിരേ ഗുരുതര ആരോപണങ്ങളാണ് ഡല്‍ഹി പൊലിസിന്റെ സ്‌പെഷല്‍ സെല്‍ എഫ്‌ഐആറില്‍ ചുമത്തിയിരുന്നത്.

കശ്മീരിനെ ഒഴിവാക്കിക്കൊണ്ടുള്ള പുതിയൊരു ഇന്ത്യന്‍ ഭൂപടം സൃഷ്ടിക്കാന്‍ പ്രബീര്‍ പുരകായസ്ത പദ്ധതിയിട്ടു, ഇതിനായി വിദേശഫണ്ടിലൂടെ 115 കോടിയിലധികം രൂപ പ്രതിഫലമായി സ്വീകരിച്ചു തുടങ്ങിയ ആരോപണങ്ങള്‍ എഫ്‌ഐആറില്‍ ഉന്നയിച്ചിരുന്നു. ഭീമാ കൊറേഗാവ് കേസില്‍ വിചാരണ നേരിടുന്ന ആക്ടിവിസ്റ്റ് ഗൗതം നവ്‌ലാഖയുമായി 1991 മുതല്‍ സൗഹൃദമുണ്ടെന്ന കാര്യങ്ങളും എഫ്‌ഐആറില്‍ പ്രതിപാദിച്ചിരുന്നു.

രാജ്യത്തിന്റെ ഐക്യത്തിനും അഖണ്ഡതയ്ക്കുമെതിരെ പ്രവര്‍ത്തിച്ചുവെന്ന് തുടങ്ങി, കൊവിഡ് 19 കാലത്ത് സര്‍ക്കാര്‍ നയങ്ങളെ വിമര്‍ശിച്ചു, കര്‍ഷകസമരത്തെ അനുകൂലിച്ചുവെന്നതടക്കമുള്ള കുറ്റങ്ങളും പൊലിസ് പ്രബീര്‍ പുരകായസ്തയ്‌ക്കെതിറീ ആരോപിക്കുന്നുണ്ട്. ബിജെപി വന്‍ ഭൂരിപക്ഷത്തോടെ വിജയിച്ച 2019 ലെ തിരഞ്ഞെടുപ്പ് അട്ടിമറിക്കാന്‍ ശ്രമം നടത്തിയെന്നും കശ്മീരും അരുണാചല്‍പ്രദേശും തര്‍ക്കപ്രദേശങ്ങളാണെന്ന് പ്രചരിപ്പിക്കാനുള്ള ഗൂഢാലോചന നടത്തിയെന്നും ആരോപണങ്ങളില്‍ പറയുന്നു.

കേന്ദ്ര സര്‍ക്കാറിനെതിരെ വിമര്‍ശനപരമായ നിലപാടുകള്‍ സ്വീകരിച്ചതിനു പിന്നാലെയൈണ് ന്യൂസ് ക്ലിക്കിന് വിദേശ ഫണ്ട് ലഭിച്ചുവെന്ന ആരോപണം ചില കേന്ദ്രങ്ങള്‍ ഉയര്‍ത്തിയത്.

യുഎപിഎ പ്രകാരം പതിനായിരത്തിനടുത്ത് പേജുള്ള കുറ്റപത്രം കഴിഞ്ഞ മാസമാണ് പൊലിസ് സമര്‍പ്പിച്ചത്. ന്യൂസ് പോര്‍ട്ടല്‍ ചൈനീസ് സ്ഥാപനങ്ങളില്‍നിന്ന് 80 കോടിയിലധികം രൂപ കൈപ്പറ്റിയതായി കുറ്റപത്രത്തില്‍ ആരോപിക്കുന്നു.