വടകര: ദേശീയപാത വികസനവുമായി ബന്ധപ്പെട്ട് അധികൃതര്‍ നടത്തുന്ന സര്‍വേ നടപടികള്‍ എന്‍.എച്ച് സംരക്ഷണസമിതി പ്രവര്‍ത്തകര്‍ വടകര ടൗണില്‍ തടഞ്ഞു. തിങ്കളാഴ്ച പതിനൊന്നോടെ കൃഷ്ണകൃപ ഓഡിറ്റോറിയത്തിന് സമീപത്താണ് സര്‍വ്വെ തടസപ്പെടുത്തിയത്. വടകര ടൗണില്‍ ഉയരപാത സ്ഥാപിച്ച് ദേശീയപാത വികസനം യാഥാര്‍ഥ്യമാക്കുക, റോഡിന്റെ ഘടന പരസ്യപ്പെടുത്തുക, സമരം ചെയ്യുന്ന സംഘടനകളുമായി ജില്ലാ ഭരണകൂടം ചര്‍ച്ചയ്ക്ക് തയാറാവുക തുടങ്ങിയ ആവശ്യങ്ങളുന്നയിച്ചാണ് സമരം നടത്തിയത്. സംഭവമറിഞ്ഞ് വന്‍ പൊലിസ് സംവിധാനവും സ്ഥലത്തെത്തിയിരുന്നു.
സമരസംഘടന ഉന്നയിച്ച കാര്യങ്ങള്‍ ജില്ലാ ഭരണകൂടത്തിന്റെ ശ്രദ്ധയില്‍ പെടുത്തുമെന്ന് എന്‍.എച്ച് സര്‍വേ വിഭാഗം തഹസില്‍ദാര്‍ കെ.പ്രദീപ്കുമാര്‍ പറഞ്ഞു. സമരത്തെ തുടര്‍ന്ന് മണിക്കൂറുകളോളം സര്‍വ്വെ നടപടികള്‍ തടസപ്പെട്ടു. കഴിഞ്ഞ രണ്ട് മാസക്കാലമായി ജില്ലയിലെ വിവിധ ഭാഗങ്ങളില്‍ വിവിധ സംഘടനകള്‍ സര്‍വേ തടയലടക്കമുള്ള സമരവുമായി രംഗത്തെത്തിയിരുന്നു. ഇതിനെ തുടര്‍ന്ന് പലയിടത്തും പൊലിസ് സഹായത്തോടെയാണ് സര്‍വേ നടക്കുന്നത്.
ആര്‍.റിജു, പി.കെ കുഞ്ഞിരാമന്‍, ടി.ക സിബി, പി. പ്രകാശ്കുമാര്‍, കെ.പി അഹമ്മദ്, വി.കെ ഭാസ്‌കരന്‍ നേതൃത്വം നല്‍കി.