കേപ്ടൗൺ: കിഴക്കൻ ആഫ്രിക്കൻ രാജ്യമായ മലാവി വൈസ് പ്രസിഡന്റ് സൗലോസ് ക്ലോസ് ചിലിമയും ഒൻപത് ഉദ്യോഗസ്ഥരും സഞ്ചരിച്ചിരുന്ന സൈനിക വിമാനം കാണാതായി. രാജ്യത്തിന്റെ പ്രസിഡന്റാണ് ഇക്കാര്യം ലോകത്തെ അറിയിച്ചത്. തലസ്ഥാനമായ ലിലോങ്‌വേയിൽനിന്ന് പറന്നുയർന്ന വിമാനം വൈകാതെ റഡാറിൽ നിന്ന് അപ്രത്യക്ഷമാവുകയായിരുന്നു. വിമാനത്തിനായി വ്യാപക തിരച്ചിൽ പുരോഗമിക്കുകയാണ്. 

രാവിലെ 9.17നാണ് വിമാനം ടേക്ക് ഓഫ് ചെയ്തത്. പത്തരയോടെ മലാവിയുടെ വടക്കൻ മേഖലയിലുള്ള മസുസുവിലെ വിമാനത്താവളത്തിലായിരുന്നു വിമാനം ലാൻഡ് ചെയ്യേണ്ടിയിരുന്നത്. മുൻ കാബിനറ്റ് മന്ത്രിയായിരുന്ന റാൽഫ് കസാംബാരയുടെ സംസ്കാര ചടങ്ങുകൾക്കായി പുറപ്പെട്ടതായിരുന്നു സംഘം. 

തിങ്കളാഴ്ച രാവിലെ തലസ്ഥാനമായ ലിലോങ്‌വേയിൽ നിന്ന് പുറപ്പെട്ടതിന് ശേഷം മലാവി ഡിഫൻസ് ഫോഴ്‌സിൻ്റെ വിമാനം റഡാറിൽ നിന്ന് അപ്രത്യക്ഷമായി എന്ന് പ്രസിഡൻഷ്യൽ ഓഫീസ് അറിയിച്ചു. വ്യോമയാന ഉദ്യോഗസ്ഥർക്ക് വിമാനവുമായി ബന്ധപ്പെടാൻ കഴിയാതിരുന്നതിനെ തുടർന്ന് തിരച്ചിൽ നടത്താനും രക്ഷാപ്രവർത്തനം നടത്താനും പ്രസിഡൻ്റ് ഉത്തരവിട്ടതായി ബിബിസി റിപ്പോർട്ട് ചെയ്തു. 

ചിലിമയുടെ ഭാര്യ മേരിയും വൈസ് പ്രസിഡൻ്റിൻ്റെ യുണൈറ്റഡ് ട്രാൻസ്‌ഫോർമേഷൻ മൂവ്‌മെൻ്റ് (യുടിഎം) പാർട്ടിയിലെ നിരവധി ഉദ്യോഗസ്ഥരും വിമാനം കാണാതാകുമ്പോൾ വിമാനത്തിൽ ഉണ്ടായിരുന്നു. ഡിഫൻസ് ഫോഴ്‌സിൻ്റെ കമാൻഡർ സംഭവത്തെക്കുറിച്ച് പറഞ്ഞതിനെത്തുടർന്ന് മലാവിയൻ പ്രസിഡൻ്റ് ലാസർ ചക്‌വേര ബഹാമാസിലേക്കുള്ള തൻ്റെ ഷെഡ്യൂൾ ചെയ്ത വിമാനം റദ്ദാക്കി.

10 വർഷമായി മലാവിയുടെ വൈസ് പ്രസിഡന്റാണ് സോളോസ് ചിലിമ. ബഹുരാഷ്ട്ര കമ്പനികളായ കൊക്ക കോളയിലും യൂണിലിവറിലും സുപ്രധാന പദവികൾ വഹിച്ച ശേഷമാണ് സോളോസ് ചിലിമ രാഷ്ട്രീയത്തിലേക്ക് ഇറങ്ങിയത്.

യുഎസ്, ബ്രിട്ടൻ, നോർവേ, ഇസ്രായേൽ എന്നിവയുൾപ്പെടെ വിവിധ രാജ്യങ്ങളിലെ ഗവൺമെൻ്റുകളുമായി താൻ ഇതിനകം ബന്ധപ്പെട്ടിട്ടുണ്ടെന്നും എല്ലാവരും തെരച്ചിലിന് പിന്തുണ വാഗ്ദാനം ചെയ്തിട്ടുണ്ടെന്നും പ്രസിഡന്റ് പറഞ്ഞു.