തിരുവനന്തപുരം: പ്ലസ് വണ്‍ സീറ്റ് പ്രതിസന്ധിയില്‍ പ്രതിഷേധിച്ചുള്ള എസ്.എഫ്.ഐയുടെ സമരത്തെ പരിഹസിച്ച് വിദ്യാഭ്യാസ മന്ത്രി വി. ശിവന്‍കുട്ടി. സമരം ചെയ്യാന്‍ എല്ലാവര്‍ക്കും അവകാശമുണ്ട്. ഇത്രയും നാളായി സമരം ചെയ്യാതിരിക്കുന്നവരല്ലേ സമരം ചെയ്ത് ഉഷാറാകട്ടെ എന്നായിരുന്നു ശിവന്‍കുട്ടിയുടെ പ്രതികരണം. 

എസ്.എഫ്.ഐ എന്താണ് മനസ്സിലാക്കിയത് എന്നറിയില്ലെന്നും സമരത്തിന് കാരണം തെറ്റിദ്ധാരണയാകുമെന്നും നാളത്തെ ചര്‍ച്ചയില്‍ അത് മാറുമെന്നും അദ്ദേഹം കൂട്ടിച്ചേര്‍ത്തു. 

മലബാറിലെ പ്ലസ് വണ്‍ സീറ്റ് സംബന്ധിച്ച് തെറ്റിദ്ധാരണ പരത്താന്‍ ശ്രമം നടക്കുന്നുവെന്ന് മന്ത്രി പറഞ്ഞു. കഴിഞ്ഞ വര്‍ഷം സീറ്റ് ക്ഷാമം ഇല്ലായിരുന്നു. 4952 സീറ്റുകള്‍ ഒഴിഞ്ഞുകിടക്കുകയായിരുന്നു. അണ്‍ എയ്ഡഡ് മേഖലയില്‍ 10,155 സീറ്റുകള്‍ ഒഴിവുണ്ട്. പാലക്കാട് 1757 സീറ്റിന്റെ കുറവാണുള്ളത്. മലപ്പുറത്ത് അലോട്ട്മെന്റ് കഴിഞ്ഞപ്പോഴാണ് കണക്കില്‍ വ്യത്യാസം വന്നതെന്നും അധിക ബാച്ച് വേണോ മറ്റെന്തെങ്കിലും മാര്‍ഗം വേണോയെന്ന് നാളത്തെ ചര്‍ച്ചയില്‍ തീരുമാനിക്കുമെന്നും മന്ത്രി പറഞ്ഞു.