അടിമാലി: അടിമാലി- കോതമംഗലം ദേശീയപാതയില്‍ വാഹനങ്ങള്‍ക്ക് മുകളിലേക്ക് കാറ്റിലും മഴയിലും മരം കടപുഴകി വീണ് അപകടം. സംഭവത്തില്‍ ഒരാള്‍ മരിച്ചു. കാര്‍ യാത്രികനായിരുന്ന രാജകുമാരി മുരിക്കുംതൊട്ടി സ്വദേശി ജോസഫ് ആണ് മരിച്ചത്. മൂന്ന് പേരെ ആശുപത്രിയില്‍ പ്രവേശിപ്പിച്ചു.

മരത്തിന്റെ അടിഭാഗം പതിച്ചതിനെ തുടര്‍ന്ന് കാര്‍ പൂര്‍ണമായും തകര്‍ന്നു. കാര്‍ വെട്ടിപ്പൊളിച്ചാണ് ഇവരെ പുറത്തെടുത്തത്. ഇന്ന് ഉച്ചയ്ക്ക് രണ്ടരയോടെയാണ് സംഭവം. 

കെ.എസ്.ആര്‍.ടി.സി ബസിനു മുകളില്‍ മരം വീണിരുന്നു. ഇത് വെട്ടിമാറ്റുന്നതിനിടെയാണ് ആ ഭാഗത്തുകൂടെ പോയ കാറിനു മുകളിലേക്ക് മരം വീണത്.