പാകം ചെയ്യാന്‍ ഏറ്റവും എളുപ്പവും പ്രോട്ടിന്‍ കൊണ്ട് സമ്പുഷ്ടവുമായ മുട്ട എളുപ്പമുള്ള ഭക്ഷണമെന്ന നിലയിലാണ് നമ്മള്‍ പാകം ചെയ്യാനായി തെരഞ്ഞെടുക്കാറുള്ളത്. മുട്ട ഏതു രീതിയില്‍ കഴിച്ചാലും പോഷകഗുണങ്ങള്‍ കുറയില്ലെന്നതാണ് മുട്ടയെ കൂടുതല്‍ സ്വീകാര്യമാക്കുന്നതും. കടകളില്‍ നിന്ന് ഒന്നിച്ചു വാങ്ങി ഫ്രിഡ്ജില്‍ വച്ച് സൗകര്യാനുസരണം ഉപയോഗിക്കുന്നതാണ് നമ്മുടെ രീതി.  

ഇനി മുട്ട ഫ്രിഡ്ജില്‍ വയ്ക്കുമ്പോള്‍ അതിന്റെ കൂര്‍ത്ത ഭാഗം അടിയില്‍ വരുന്ന രീതിയിലാണ് വയ്‌ക്കേണ്ടത്. അല്ലെങ്കില്‍ പെട്ടെന്നു കേടുവരാനുള്ള സാധ്യത കൂടുതലാണ്. ഇനി മുട്ട പാകം ചെയ്യാന്‍ എടുക്കുകയാണെങ്കില്‍ അരമണിക്കൂറെങ്കിലും പുറത്ത് വച്ച് പഴയ ഊഷ്മാവിലേക്ക് വരാനുള്ള സമയവും കൊടുക്കണം. 

മൂന്നാഴ്ചവരെയൊക്കെ മുട്ട ഫ്രിഡ്ജില്‍ സൂക്ഷിക്കാം. എന്നാല്‍ രണ്ടു ദിവസം മാത്രമേ പൊട്ടിച്ച മുട്ട ഫ്രിഡ്ജില്‍ വയ്ക്കാന്‍ പറ്റൂ. പുഴുങ്ങിയ മുട്ടയാണെങ്കില്‍ ഒരാഴ്ച വരെയും സൂക്ഷിക്കാവുന്നതാണ്. മുട്ട ഒരിക്കലും കഴുകി സൂക്ഷിക്കരുത്. കാരണം ഈര്‍പ്പം തട്ടിയാല്‍ കേടുവരാന്‍ സാധ്യത കൂടുതലാണ.്
ഇവ തുണി ഉപയോഗിച്ച് തുടച്ചു വേണം ഫ്രിഡ്ജില്‍ സൂക്ഷിക്കാന്‍.

മുട്ടയുടെ പുറത്ത് എണ്ണ തേച്ചു സൂക്ഷിച്ചാല്‍ ഒരു മാസം വരെ ഒക്കെ കേടുവരാതെയിരിക്കും. നമ്മുടെ നാട്ടില്‍ രണ്ടു രീതിയില്‍ മുട്ട സൂക്ഷിക്കാറുണ്ട്. ഫ്രിഡ്ജില്‍ വയ്ക്കുന്നവരും അല്ലാതെ പുറത്ത് വയ്ക്കുന്നവരും.  പുറത്തെ ചൂടിലിരിക്കുമ്പോള്‍ മുട്ട കെട്ടു പോകാനുള്ള സാധ്യത കൂടുതലായതിനാല്‍ ഫ്രിഡ്ജില്‍ വയ്ക്കുന്നത് തന്നെയാവും നല്ലത്.