തിരുവനന്തപുരം: ലോക്‌സഭാ തെരഞ്ഞെടുപ്പിലേറ്റ കനത്ത തോൽവിയുടെ പശ്ചാത്തലത്തിൽ 'തിരുത്തലിന്' സർക്കാർ. ക്ഷേമപെൻഷനുകൾ വർധിപ്പിക്കുമെന്നും കുടിശ്ശികകൾ സമയബന്ധിതമായി തീർക്കുമെന്നും ഇന്നലെ നിയമസഭയിൽ ചട്ടം 300 പ്രകാരം മുഖ്യമന്ത്രി പിണറായി വിജയൻ പ്രത്യേക പ്രസ്താവന നടത്തി.

എന്നാൽ ക്ഷേമപെൻഷൻ അടക്കമുള്ള ആനുകൂല്യങ്ങളും കുടിശ്ശികകളെല്ലാം കൊടുക്കുമെന്ന് നിയമസഭയിൽ മുഖ്യമന്ത്രി ഉറപ്പു നൽകുേമ്പാഴും ഇതിനെല്ലാം പണമെവിടെ എന്ന ചോദ്യം ബാക്കി നിൽക്കുന്നു. ഏതാണ്ട് 30,000 കോടി വേണം ഈ സാമ്പത്തിക വർഷം പ്രഖ്യാപനങ്ങൾ നടപ്പിലാക്കാൻ. ജനപിന്തുണ വീണ്ടെടുക്കാനാണ് സർക്കാരിന്റെ നീക്കമെങ്കിലും കടമെടുത്തു മുടിഞ്ഞ ഖജനാവ് എങ്ങനെ നിറക്കുമെന്നതാണ് പ്രശ്‌നം.

നികുതി പിരിവ് കാര്യക്ഷമമാക്കുമെന്ന് പറയുമ്പോഴും ഇത്രയും തുക വിനിയോഗിക്കാൻ എവിടെ നിന്ന് കണ്ടെത്തുമെന്ന് പ്രതിപക്ഷം ചോദിച്ചിട്ടുണ്ട്. കൂടുതൽ കടമെടുക്കാൻ കേന്ദ്രം അനുമതി നൽകിയേക്കില്ല. നിലവിൽ വരുമാനത്തിന്റെ അറുപത് ശതമാനവും ശമ്പളവും പെൻഷനും നൽകാൻ വേണ്ടി വരും.

വരുമാനം വർധിപ്പിക്കുന്നതോടൊപ്പം ചിലവുകളിൽ മിതവ്യയം പാലിക്കുകയും സർക്കാർ സേവനങ്ങൾ ജനങ്ങളിൽ സുതാര്യമായും സങ്കീർണമല്ലാതെയും എത്തിക്കാനുള്ള പ്രത്യേക ഉത്തരവുകൾ ഈ മാസം 31നകം ബന്ധപ്പെട്ട വകുപ്പുകൾ പുറപ്പെടുവിക്കുമെന്നാണ് മുഖ്യമന്ത്രി നിയമസഭയിൽ പ്രഖ്യാപിച്ചത്. ഇതിനു മേൽനോട്ടം വഹിക്കാൻ ചീഫ് സെക്രട്ടറിയെ ചുമതലപ്പെടുത്തുമെന്നും മുഖ്യമന്ത്രി പറഞ്ഞു. നികുതിനികുതിയേതര വരുമാനം പരമാവധി വർധിപ്പിക്കാനുള്ള പരിശ്രമങ്ങളാണ് സർക്കാർ നടത്തിവരുന്നത്. നികുതിയേതര വരുമാന വർദ്ധനയ്ക്കായി വകുപ്പ് സെക്രട്ടറിമാരുടെ നേതൃത്വത്തിൽ ഇതിനാവശ്യമായ ഫലപ്രദമായ നടപടികൾ സ്വീകരിക്കുമെന്ന് മുഖ്യമന്ത്രി പറഞ്ഞു.

 സാധാരണക്കാർ ഉൾപ്പെടെ പാർട്ടിയിൽ നിന്നും അകന്നുവെന്ന വിലയിരുത്തലിനെ തുടർന്നാണ് പാർട്ടി നിർദേശത്തെ തുടർന്ന് സർക്കാരിന്റെ തിരുത്തൽ നടപടികൾ സഭയിൽ പ്രഖ്യാപിച്ചത്. പ്രകടനപത്രികയിൽ പെൻഷൻ 2600 രൂപ ആക്കുമെന്ന് എൽ.ഡി.എഫ് വാഗ്ദാനം ചെയ്തിരുന്നുവെങ്കിലും എത്ര വർധിപ്പിക്കുമെന്ന് മുഖ്യമന്ത്രി വ്യക്തമാക്കിയിട്ടില്ല. ക്ഷേമ പെൻഷൻ ഉൾപ്പെടെ 17 ഇനം പെൻഷൻ കുടിശ്ശിക സമയബന്ധിതമായി വിതരണം ചെയ്യുമെന്നും ക്ഷേമ പെൻഷൻ ഇനിയും വർധിപ്പിക്കാനാണ് ലക്ഷ്യമിടുന്നതെന്നും മുഖ്യമന്ത്രി നിയമസഭയിൽ പറഞ്ഞു. സർക്കാർ ജീവനക്കാർക്കും പെൻഷൻകാർക്കും ഡി.എ കുടിശ്ശികയിൽ ഓരോ സാമ്പത്തിക വർഷവും രണ്ട് ഗഡു വീതം കൊടുത്ത് കുടിശ്ശിക തീർക്കുമെന്നും മുഖ്യമന്ത്രി പറഞ്ഞു. മരുന്ന് വിതരണത്തിനുള്ള ബില്ലുകളിലും വന്ന കുടിശികയും സപ്ലൈകോയുടെ കുടിശ്ശികയും സമയബന്ധിതമായി തീർക്കുമെന്നും മുഖ്യമന്ത്രി പറഞ്ഞു.

സർക്കാർ സേവനങ്ങൾ ഗുണഭോക്താക്കൾക്ക് തടസം കൂടാതെ ലഭ്യമാക്കാൻ സാധ്യമായ എല്ലാ നടപടികളും സർക്കാർ സ്വീകരിച്ചുവരുന്നുണ്ടെന്നാണ് മുഖ്യമന്ത്രിയുടെ അവകാശ വാദം. സാധാരണക്കാർ നേരിടുന്ന പ്രശ്‌നങ്ങൾ പരിഹരിക്കാൻ സർക്കാർ എല്ലാ നടപടികളും സ്വീകരിക്കുമെന്നും മുഖ്യമന്ത്രി പറഞ്ഞു.

ഡി.എ കുടിശ്ശിക 7 മാസത്തെ

The Chief Minister promises to increase pensions, Where is the required Rs 30,000 crore?