പത്തനംതിട്ട: സെപ്റ്റംബർ-ഒക്ടോബർ മാസങ്ങളിൽ ആരംഭിക്കുന്ന പാർട്ടി സമ്മേളനങ്ങൾ ലക്ഷ്യമിട്ട് സി.പി.എമ്മിൽ സജീവമായ പിണറായി വിരുദ്ധചേരിക്ക് ശക്തിപകർന്ന് പഴയ വി.എസ് പക്ഷവും. ലോക്‌സഭാ തെരഞ്ഞെടുപ്പിലെ കനത്ത തോൽവിയെ തുടർന്ന് സർക്കാരിനും മുഖ്യമന്ത്രി പിണറായി വിജയനുമെതിരേ ജില്ലാ കമ്മിറ്റികളിൽ നിന്നുയർന്ന വിമർശനങ്ങൾ പിണറായി വിരുദ്ധചേരിയുടെ ശക്തിപ്രകടനം കൂടിയായാണ് വിലയിരുത്തുന്നത്. 

തോൽവിയിലും പിണറായിക്കെതിരേ രംഗത്തുവരാൻ നേതാക്കൾ മടികാണിച്ച സമയത്താണ് വിപ്ലവഭൂമിയായ ആലപ്പുഴയിൽനിന്ന് മുതിർന്ന നേതാവ് ജി. സുധാകരൻ വിമർശനം ചൊരിഞ്ഞത്. സുധാകരനു പിന്നാലെ തോമസ് ഐസക്കും തുടർന്ന് എം.എ ബേബിയും തെറ്റുകൾ ചൂണ്ടിക്കാട്ടിയതോടെ താഴെത്തട്ടിലും ഇതിന്റെ അലയൊലികൾ പ്രകടമായി. പോളിറ്റ് ബ്യൂറോ അംഗം കൂടിയായ എം.എ ബേബിയുടെ നേതൃത്വത്തിൽ തിരുത്തൽ വിഭാഗം അണിയറയിൽ ചരടുവലികൾ നടത്തുന്നതായാണ് വിവരം.

 
സി.പി.എം ജനറൽ സെകട്ടറി സീതാറാം യെച്ചൂരിയുടെ പിന്തുണയോടെയാണ് നീക്കമെന്നാണ് റിപ്പോർട്ടുകൾ. മറ്റൊരു പോളിറ്റ് ബ്യൂറോ അംഗമായ എ. വിജയരാഘവനും സമാന നിലപാടിലാണ്. എളമരം കരീം, കെ.കെ ശൈലജ, കെ. രാധാകൃഷ്ണൻ തുടങ്ങിയവർക്കും നിലവിലെ അവസ്ഥയോട് യോജിപ്പില്ല. ഇ.പി ജയരാജൻ, പി.കെ ശ്രീമതി എന്നിവരുടെ മനസറിയാൻ ശ്രമം നടക്കുന്നതായും വിവരമുണ്ട്. 

 വി.എസ് അച്യുതാനന്ദൻ രോഗശയ്യയിലായതോടെ അസ്തമിച്ച പഴയ വി.എസ് പക്ഷം ലോക്‌സഭാ തെരഞ്ഞെടുപ്പ് തോൽവിയെ തുടർന്ന് വീണ്ടും രംഗത്തെത്തിയത് പിണറായി വിരുദ്ധ ചേരിക്ക് ശക്തി പകർന്നിട്ടുണ്ട്. പി.കെ ഗുരുദാസൻ കൊല്ലം ജില്ലാ അവലോകന യോഗത്തിൽ വികാരാധീനനായി സംസാരിച്ചതിന്റെ ആവേശത്തിലാണ് വി.എസ് പക്ഷം. 

The VS faction also strengthened the anti-Pinarayi camp