കോപ അമേരിക്ക ഫുട്ബോളിന്റെ ഫൈനൽ ലൈനപ്പായി. രണ്ടാം സെമിയിൽ കരുത്തന്മാർ നേർക്കുനേർ ഏറ്റുമുട്ടിയ മത്സരത്തിൽ യുറുഗ്വായ്‌‍യെ വീഴ്ത്തി കൊളംബിയ ഫൈനലിൽ എത്തി. എതിരില്ലാത്ത ഒരു ഗോളിനാണ് കൊളംബിയയുടെ സെമി വിജയം. 39–ാം മിനിറ്റിൽ മിഡ്ഫീൽഡർ ജെഫേഴ്സൺ ലേമയാണ് കൊളംബിയയ്ക്കായി ഗോൾ നേടിയത്. ഫൈനലിൽ അർജന്റീനയാണ് കൊളംബിയയുടെ എതിരാളികൾ.

കൊളംബിയൻ സൂപ്പർ താരം ജെയിംസ് റോഡ്രിഗസിന്റെ ടച്ചുള്ള ഗോളിലായിരുന്നു കൊളംബിയയുടെ വിജയം. കോര്‍ണറിലൂടെ തനിക്ക് ലഭിച്ച പന്ത്, റോഡ്രിഗസ് പെനാല്‍റ്റി ബോക്‌സിലേക്ക് പാസ് ചെയ്ത നൽകുകയും ജെഫേഴ്സൺ ലേമ അതു ഹെഡ് ചെയ്ത് ഗോൾ വലയിലേക്ക് കയറ്റുകയുമായിരുന്നു. ടൂര്‍ണമെന്റിൽ ജെയിംസ് റോഡ്രിഗസിന്റെ ആറാമത്തെ അസിസ്റ്റാണിത്. ഇതോടെ മെസ്സിയെ മറികടന്ന് ഒരു കോപ്പ അമേരിക്കയില്‍ ഏറ്റവും കൂടുതല്‍ അസിസ്റ്റ് നല്‍കുന്ന താരമെന്ന റെക്കോഡ് റോഡ്രിഗസിന് സ്വന്തമായി.

നേരത്തെ ആദ്യ സെമിയിൽ കാനഡയെ തോൽപ്പിച്ച് അർജന്റീന ഫൈനലിൽ പ്രവേശിച്ചിരുന്നു. ഇന്ത്യൻ സമയം തിങ്കളാഴ്ച പുലർച്ചെ 5.30 നാണ് മത്സരം.