മുംബൈ: കനത്ത മഴയില്‍ മുംബൈയില്‍ വിവിധയിടങ്ങളില്‍ വെള്ളക്കെട്ട് രൂപപ്പെട്ടു. വെള്ളം ഉയര്‍ന്നതിന് പിന്നാലെ മുംബൈ നഗരത്തിലെ പല റോഡുകളും അടച്ചു.

കര്‍ണാടകയിലെ ഉത്തര കന്നഡ, ഷിമോഗ, ഉഡുപ്പി, ചിക്കമഗളൂര്‍ എന്നിവിടങ്ങളില്‍ കാലാവസ്ഥാ വകുപ്പ് റെഡ് അലര്‍ട്ട് പ്രഖ്യാപിച്ചിട്ടുണ്ട്.
 
മുംബൈയിലും പല്‍ഗാറിലും യെല്ലോ അലര്‍ട്ടും താനെയില്‍ ഓറഞ്ച് അലര്‍ട്ടും പ്രഖ്യാപിച്ചിരിക്കുകയാണ്. റെയില്‍വേ ട്രാക്കിലും വെള്ളം കയറിയതോടെ പല ട്രെയിനുകളും വൈകി ഓടുന്നു. 

വെള്ളിയാഴ്ച രാവിലെ 8 മണി മുതല്‍ രാത്രി 9 മണി വരെ 52.89 മില്ലിമീറ്റര്‍ മഴയാണ് രേഖപ്പെടുത്തിയത്. ഇന്നലെ, മുംബൈയുടെ നഗരഭാഗത്ത് ശരാശരി 78 മില്ലീമീറ്ററും കിഴക്കന്‍, പടിഞ്ഞാറന്‍ മുംബൈയില്‍ യഥാക്രമം 57 മില്ലീമീറ്ററും 67 മില്ലീമീറ്ററും മഴ രേഖപ്പെടുത്തി. നഗരത്തില്‍ ഇടത്തരം മുതല്‍ ശക്തമായ മഴ പെയ്യുമെന്ന് കാലാവസ്ഥാ നിരീക്ഷണ കേന്ദ്രം അറിയിച്ചു.