തിരുവനന്തപുരം: സംസ്ഥാനത്തെ കലാലയങ്ങളിൽ കടുത്ത വിമർശനം നേരിടുന്നതിനിടെ പ്രതിഛായ മെച്ചപ്പെടുത്താനുള്ള നടപടികൾ സ്വീകരിക്കാൻ എസ്.എഫ്.ഐ തീരുമാനം. സി.പി.എം സംസ്ഥാന സമിതിയിൽ പാർട്ടിക്കും സർക്കാരിനും 34 തെറ്റു തിരുത്തൽ മാർഗനിർദേശങ്ങൾ ചർച്ച ചെയ്തതിനു പിന്നാലെയാണ് എസ്.എഫ്.ഐയും മുഖം മുനുക്കുന്നത്.

പല കോളജ് ക്യാംപസുകളിലും എസ്.എഫ്.ഐ തുടർന്നുവന്ന അനിഷേധ്യ ഭരണം ഇന്നവർക്ക് നഷ്ടപ്പെടാനുണ്ടായ സാഹചര്യവും വിദ്യാർഥി നേതാക്കളുടെ ഇത്തരം നടപടികളാണെന്ന വിലയിരുത്തലിന്റെ അടിസ്ഥാനത്തിലാണ് പെരുമാറ്റച്ചട്ടം പോലെ മുഖഛായ നന്നാക്കാനുളള ശ്രമം നടക്കുന്നത്.

ഒപ്പം സംഘടനയ്ക്കുവേണ്ടി രക്തസാക്ഷികളായവരുടെ വിവരങ്ങൾ വിദ്യാർഥികളുമായി പങ്കുവയ്ക്കും. അക്രമികളാണെന്ന ആരോപണത്തിനു തടയിടുകയാണ് ഇതിലൂടെ ലക്ഷ്യം വയ്ക്കുന്നത്. കൂടാതെ വർഗീയത, അധിനിവേശം എന്നിവയ്‌ക്കെതിരേ പ്രചാരണം നടത്തുകയും ചെയ്യും.

നിലവിൽ എസ്.എഫ്.ഐ ഏറ്റെടുക്കുന്ന വിഷയങ്ങൾ ഒന്നുപോലും കാംപസുകളിൽ യാതൊരു ചലനങ്ങളുമുണ്ടാക്കുന്നില്ലെന്നത് നേതൃത്വം തിരിച്ചറിഞ്ഞിട്ടുണ്ട്. വിദ്യാർഥി രാഷ്ട്രീയത്തിൽ പിന്നോട്ടുപോയാൽ പാർട്ടിക്ക് കനത്ത തിരിച്ചടി ഉണ്ടാകുമെന്ന് നേതൃത്വം ഭയപ്പെടുന്നുമുണ്ട്. അതുകൊണ്ടുതന്നെയാണ് എസ്.എഫ്.ഐയുടെ പ്രതിഛായ മെച്ചപ്പെടുത്താൻ സി.പി.എമ്മും അരയും തലയും മുറുക്കി രംഗത്തുള്ളത്.

CPM Issues Rectification Directive; SFI Also to Revamp Image