കൊച്ചി: ഇന്ന് അന്താരാഷ്ട്ര പൂച്ച ദിനം. ഈ പൂച്ച ദിനത്തില്‍ കൊച്ചി മറൈന്‍ ഡ്രൈവില്‍ വേറിട്ടൊരു പ്രതിഷേധം നടന്നു. പൂച്ച ദിനത്തോടനുബന്ധിച്ച് പീപ്പിള്‍ ഫോര്‍ ദ എത്തിക്കല്‍ ട്രീറ്റ്‌മെന്റ് ഓഫ് ആനിമല്‍സ് ഇന്ത്യയുടെ നേതൃത്വത്തില്‍ പ്രതീകാത്മകമായി പൂച്ച ഇറച്ചി വിറ്റാണ് പ്രതിഷേധം സംഘടിപ്പിച്ചത്. വിവിധ പാത്രങ്ങളിലായി നിരത്തിവച്ചിരിക്കുകയാണ് പൂച്ചകളെ.

അവയുടെ ഇറച്ചിക്കുള്ള വിലയും രേഖപ്പെടുത്തിയിട്ടുണ്ട്. ഇതൊരു മാംസം വില്‍ക്കുന്ന കടയാണെന്ന് ആരും തെറ്റിദ്ധരിക്കരുത്. പൂച്ചയെ പാകം ചെയ്ത് കഴിക്കാത്തവര്‍ മത്സ്യവും കഴിക്കരുത് എന്ന സന്ദേശമാണ് പീറ്റ ഇന്ത്യ എന്ന സംഘടന ഇതിലൂടെ പ്രചരിപ്പിക്കുന്നത്. എല്ലാ മൃഗങ്ങളും വേദനയും ഭയവും ഉള്ളവരാണെന്നും മാംസാഹാരം വെടിഞ്ഞ് സസ്യഭക്ഷണം ശീലമാക്കണമെന്നുമാണ് ഈ സംഘടന പ്രതീകാത്മകമായി പറഞ്ഞു വയ്ക്കുന്നത്.

പൂച്ചകളുടെ രൂപത്തിലുള്ള പാവകളാണ് ഇവര്‍ ഉപയോഗിച്ചിരിക്കുന്നത്. മത്സ്യങ്ങളുടെ സംരക്ഷണത്തിനാണ് പീറ്റ ഈ കാംപയ്‌നിലൂടെ ഊന്നല്‍ നല്‍കുന്നത്. മത്സ്യങ്ങള്‍ക്കും വേദനയുണ്ടെന്നും പരസ്പരം ആശയവിനിമയം നടത്തി ജീവിക്കുന്ന ഇവയെ പലപ്പോഴും ജീവനോടെ ചുട്ടും ചതച്ചും കറിവച്ചുമാണ് മനുഷ്യന്‍ ആഹാരമാക്കിയിരിക്കുന്നു എന്നതാണ് പീറ്റയുടെ പരാതി. ആഗോളതലത്തില്‍ സസ്യാഹാരത്തിലേക്കുള്ള മാറ്റം അത്യാവശ്യമാണെന്നാണ് പീറ്റ പറയുന്നത്.