ശ്രീനഗര്‍: ജമ്മുകശ്മിരില്‍ ഭീകരരുമായുണ്ടായ ഏറ്റുമുട്ടലില്‍ സൈനിക ക്യാപ്റ്റന് വീരമൃത്യു. 48 രാഷ്ട്രീയ റൈഫിള്‍സ് ക്യാപ്റ്റന്‍ ദീപക് സിങ്ങാണ് ഏറ്റുമുട്ടലിനിടെ വീരമൃത്യു വരിച്ചത്. 

കശ്മിരിലെ ദോഡയിലെ ശിവ്ഘട്ട്- അസര്‍ മേഖലയിലാണ് ഏറ്റുമുട്ടലുണ്ടായത്. ബുധനാഴ്ച്ച രാവിലെയോടെ നാല് ഭീകരര്‍ സൈനികര്‍ക്ക് നേരെ വെടിയുതിര്‍ക്കുകയായിരുന്നു. ഭീകരരുടെ ആക്രമണത്തില്‍ നാട്ടുകാരനായ ഒരാള്‍ക്കും പരുക്കേറ്റിട്ടുണ്ട്. 

വെടിവെപ്പില്‍ ഒരു ഭീകരന് പരുക്കേറ്റിട്ടുണ്ടെന്നും ഇയാള്‍ക്കായി തെരച്ചില്‍ നടക്കുകയാണെന്നും സൈന്യം അറിയിച്ചു. 

ചൊവ്വാഴ്ച വൈകീട്ട് ഉദ്ദംപുരിന് സമീപം പട്നിടോപില്‍ ഭീകരരും സൈന്യവും തമ്മില്‍ ഏറ്റുമുട്ടല്‍ നടന്നിരുന്നു. ഇതിനുപിന്നാലെയാണ് ഭീകരര്‍ ദോഡയിലെ വനമേഖലയിലേക്ക് കടന്നത്.