കൊണ്ടോട്ടി: സംസ്ഥാന ഹജ്ജ് കമ്മിറ്റിക്ക് കീഴിൽ ഹജ്ജിന് അപേക്ഷിക്കുന്നവർക്ക് മാർഗനിർദേശങ്ങൾ പുറപ്പെടുവിച്ച് കേന്ദ്ര ഹജ്ജ് കമ്മിറ്റി. 2026 ജനുവരി 15വരെ കാലാവധിയുള്ള മെഷിൻ റീഡബിൾ പാസ്പോർട്ട് ഉണ്ടായിരിക്കണം.

കേരളത്തിൽ നിന്ന് മൂന്ന് എമ്പാർക്കേഷൻ പോയിന്റുകളാണുള്ളത്. കോഴിക്കോട്, കൊച്ചി, കണ്ണൂർ. സൗകര്യപ്രദമായ രണ്ട് എംപാർക്കേഷൻ പോയിന്റുകൾ മുൻഗണനാക്രമത്തിൽ രേഖപ്പെടുത്തണം. എംപാർക്കേഷൻ പോയിന്റ് പിന്നീട് മാറ്റാൻ കഴിയില്ല.

ജനറൽ കാറ്റഗറിയിൽ കുടുംബാംഗങ്ങളും അടുത്ത ബന്ധുക്കളുമായ പരമാവധി അഞ്ചുപേർക്കും രണ്ട് കുട്ടികൾക്കും വരെ ഒരുകവറിൽ അപേക്ഷിക്കാം. കവർ ലീഡർ പുരുഷനായിരിക്കണം. പണമിടപാടിന്റെ ചുമതല കവർ ലീഡർക്കുളളതാണ്. ഹജ്ജ് കമ്മിറ്റി മുഖേന ഹജ്ജ് ചെയ്തിട്ടില്ലാത്ത വരായിരിക്കണം. ഇതിന് നിർദിഷ്ട മാതൃകയിലുള്ള സത്യപ്രസ്താവന സമർപ്പിക്കണം.

സഹായി 18നും 60നുമിടയിലുള്ളവരായിരിക്കണം. സഹായിയുമായുള്ള ബന്ധം രേഖാമൂലം വ്യക്തമാക്കണം. സഹായി അപേക്ഷകൻ്റെ ഭാര്യ,ഭർത്താവ്, മകൻ, മകൾ, മകളുടെ ഭർത്താവ്, മകന്റെ ഭാര്യ, സഹോദരൻ, സഹോദരി, മക്കളുടെ മക്കൾ, സഹോദരപുത്രൻ, സഹോദര പുത്രി എന്നിവയിലാരെങ്കിലുമായിരിക്കണം.

ലേഡീസ് വിതൗട്ട് മെഹ്റം വിഭാഗത്തിൽ രണ്ടുവിഭാഗമുണ്ട്. ഹജ്ജ് കർമത്തിന് പോകാൻ പുരുഷ മെഹ്റമായി ആരും ഇല്ലാത്ത സ്ത്രീകൾ ഒരു സഹായിയോടൊപ്പമാണ് അപേക്ഷിക്കേണ്ടത്. സഹായി 45നും 60 നുമിടയിലുള്ളവരായിരിക്കണം. അപേക്ഷകർ ഹജ്ജ് ചെയ്തിട്ടില്ലാത്തവരായിരിക്കണം. മുമ്പ് ഹജ്ജ് ചെയ്യാത്ത സഹായികൾ ലഭ്യമല്ലെങ്കിൽ മാത്രം ചെയ്തവരെ ഉൾപ്പെടുത്തും.

അപേക്ഷകർ ഹജ്ജ് ചെയ്തിട്ടില്ലാത്തവരായിരിക്കണം. ഇതിന് നിർദ്ദിഷ്ട മാതൃകയിലുള്ള സത്യപ്രസ്താവന സമർപ്പിക്കണം. അപേക്ഷയുടെയും ഉള്ളടക്കങ്ങളുടെയും (പാസ്പോർട്ടുൾപ്പെടെ) ഫോട്ടോ കോപ്പിയെടുത്ത് സൂക്ഷിക്കണം. സൂക്ഷ്മ പരിശോധനക്ക് ശേഷം സ്വീകാര്യമായ അപേക്ഷകൾക്ക് ഹജ്ജ്കമ്മിറ്റി കവർ നമ്പർ അലോട്ട് ചെയ്യും.

തെരഞ്ഞെടുക്കപ്പെടുന്നവർ ഡൗൺലോഡ് ചെയ്ത അപേക്ഷാ ഫോറവും അനുബന്ധ രേഖകളും, നറുക്കെടുപ്പിന് ശേഷം കേന്ദ്ര ഹജ്ജ് കമ്മിറ്റി നിർദ്ദേശിക്കുന്ന സമയത്തിനകം സംസ്ഥാന ഹജ്ജ് കമ്മിറ്റിക്ക് നേരിട്ട് സമർപ്പിക്കണം. രേഖകൾ സമർപ്പിക്കാത്തവരുടെ തെരഞ്ഞെടുപ്പ് റദ്ദാക്കും. അത്തരം സീറ്റുകളിലേക്ക് വെയ്റ്റിംഗ് ലിസ്റ്റിലുള്ളവരെ മുൻഗണനാക്രമത്തിൽ തെരഞ്ഞെടുക്കും.